- वि.सं २o८२ भदौ २० शुक्रबार
नेपाल सरकारले दुई दर्जनभन्दा बढी सामाजिक सञ्जाल प्लाटफर्मलाई बन्द गरेको छ। मन्त्रिपरिषद्को निर्णयका आधारमा बिहीबार नेपाल दूरसञ्चार प्राधिकरणले इन्टरनेट सेवा प्रदायकहरूलाई ती प्लाटफर्महरूमा नेपालबाट पहुँच नदिन निर्देशन दियो।
तर, प्रधानमन्त्री केपी ओलीकै सचिवालय भने शुक्रबारसम्म पनि तिनै सामाजिक सञ्जालहरूबाट सूचना सम्प्रेषित गरिरहेको छ। केहीबेरअघि मात्र गोदावरीमा सुरु भएको एमाले विधान महाधिवेशनसम्बन्धी सूचना र तस्बिरहरू ह्वाट्सएप ग्रुपदेखि फेसबुक पेजहरूसमार्फत सचिवालयले सार्वजनिक गरिरहेकाे छ।
प्रधानमन्त्री ओलीका प्रेस सल्लाहकार प्रकाश सिलवाललाई यसबारेमा साेध्दा बन्द गरिए पनि सामाजिक सञ्जाल चलेसम्म चलाउने बताउँछन्। ‘चल्दासम्म हामीले त्यही माध्यमबाट सूचना पठाउने हो। चलाउनै हुँदैन भन्ने छैन,’ उनले भने।
