सत्ता गठबन्धनको पक्षमा विज्ञप्ति जारी गर्ने पाँच पत्रकार संगठनलाई निर्वाचन आयोगले स्पष्टिकरण मागेको छ । सत्ता गठबन्धनको पक्षमा विज्ञप्ति जारी गर्ने नेपाल प्रेस युनियन, प्रेस सेन्टर नेपाल, समाजवादी प्रेस संगठन, नेपाल प्रेस मञ्च र प्रगतिशील पत्रकार संघले जारी गरेको ‘मतदाताहरुलाई हार्दिक अपिल’ विषयको विज्ञप्तिप्रति ध्यानआकर्षण भएको जनाउँदै आयोगले उल्लेखित संगठनहरुलाई २४ घण्टाभित्र लिखित जवाफ पेश गर्न निर्देशन दिएको हो ।
‘पत्रकारिताको क्षेत्र र राजनीतिक क्षेत्र भिन्न हो, होइन ? कुनै पनि सञ्चार प्रतिष्ठान सम्बद्ध कर्मचारी र पत्रकारले पेशागत संघ÷संगठनमा आवद्ध भई सो मार्फत निर्वाचन आचारसंहिता विपरित वक्तव्य जारी गर्दा आचारसंहिता उल्लंघन हुँदैन भन्ने दलिल पेश गर्न मिल्छ, मिल्दैन ?’, आयोगद्वारा जारी विज्ञप्तिमा उल्लेखित संगठनहरुलाई प्रश्न गरिएको छ ।
निर्वाचन आचारसंहितामा सञ्चार प्रतिष्ठान तथा सोमा आबद्ध कर्मचारी तथा पत्रकारले राजनीतिक दल वा उम्मेदवारको निर्वाचन प्रचारप्रसारको लागि निशुल्क वा प्रायोजित विज्ञापन प्रकाशन, प्रसारण वा सम्प्रेषण गर्न नहुने व्यवस्था छ ।
