नेपाल मार्सल आर्टस् हाप्किडो संघको व्यवस्थापन तथा नुवाकोट जिल्ला मार्सल आर्टस् हाप्किडो संघको आयोजनामा भएको प्रथम राष्ट्रिय भर्चुअल सेल्फ डिफेन्स हाप्किडो च्याम्पियनसिपमा आयोजक टोली च्याम्पियन भएको छ । शनिबार सम्पन्न भएको प्रतिस्पर्धामा नुवाकोटका चार खेलाडीले स्वर्ण जिते । समीर गुरुङ, दिनेश गुरुङ, निमेष गुरुङ र मनराज गुरुङले आयोजक नुवाकोटलाई च्याम्पियन बनाएका हुन् । दाङको टोली दोस्रो तथा कास्की तेस्रो भयो । दाङका चेतन वली र गोपाल बिके, कास्कीका कृतिका गिरी र अन्जना परियारले कांस्य जितेका थिए ।
प्रतियोगितामा स्वर्ण जित्ने खेलाडीले जनही दश हजार प्राप्त गरेको आयोजकका अध्यक्ष मनोज गुरुङले जानकारी दिए । यस्तै, रजत जित्ने खेलाडीले सात हजार पाँच सय र कास्य पदक जित्ने खेलाडीले पाँच हजार प्राप्त गरेको उनले जानकारी दिए । सहभागी सबै खेलाडीहरूले प्रमाणपत्र र मेडल प्राप्त गरेका थिए ।
प्रतियोगितामा विभिन्न ३० जिल्लाका क्लब, स्कुल, डोजाङबाट ८० टोलीले सहभागिता जनाएका थिए । खेलाडीहरूले पठाएको भिडियोमार्फत नेपाल मार्सल आर्टस् हाप्किडो संघका प्रमुख प्रशिक्षक सुस्मिता गुरुङ, सहायक प्रमुख प्रशिक्षकहरू भुवन बुढामगर र प्रवीण गुरुङले निर्णय दिएका थिए ।
प्रतियोगिताको पुरस्कारका लागि हेल्थ एन्ड एजुकेसन नेपालका अध्यक्ष जगतबहादुर लामाले प्रायोजक गरेका हुन् ।
