खोटाङ । दिक्तेल रूपाकोट मझुवागढी नगरपालिका– ११, खार्मी निवासी पेसलकुमार मगर र दुर्गा आलेमगरका चार वर्षीय छोरा प्रिजल मगर ११ दिनदेखि कान्ति बाल अस्पताल काठमाडौंको आइसियू (सघन उपचार कक्ष)मा उपचाररत छन् । यही कातिक १२ गते सामान्य बान्ता गरेका प्रिजल एक्कासि सिकिस्त बिरामी बनेपछि उपचारका लागि कातिक १३ गते कान्ति बाल अस्पताल भर्ना गरिएको हो ।
भर्खर विद्यालय भर्ना गरेर कखरा सिक्दै गरेका प्रिजलको दुवै मिर्गाैला फेल (काम नलाग्ने) भएको उपचारमा संलग्न स्वास्थ्यकर्मीहरूले बताएका छन् । अस्पताल भर्ना गरेको भोलिपल्टबाट आइसियूमा राखेर उपचार सुरु गरिएको छ । प्रिजलको अवस्था चिन्ताजनक रहेको अस्पताल स्रोतले जनाएको छ ।
अस्पताल भर्ना गरेपछि अहिलेसम्म पिसाबसमेत नगरेका प्रिजलको नेपालमा उपचार सम्भव नभएपछि थप उपचारका लागि अन्यत्र लैजान आग्रह गरिएको उपचारमा संलग्न डा, विमला बानियाँले जानकारी दिइकी छिन् । दिनानुदिन स्वास्थ्य अवस्था बिग्रँदै गएको प्रिजललाई कान्ति बाल अस्पतालले भारतको नयाँ दिल्लीस्थित सर गंगाराम अस्पताल लैजान सुझाव दिएको पीडित परिवारले बताएका छन् ।
भारत लगेर चाँडोभन्दा चाँडो उपचार नगराइए प्रिजलको ज्यानै तलमाथि हुने खतरा रहेको उपचारमा संलग्न स्वास्थ्यकर्मीहरूले बताएको बुवा पेसलकुमारले बताए। ‘आफूसँग भएको र आफन्तसँग सापटी लिएको रकमले उपचार गरिरहेका छौँ । उपचारमा संलग्न स्वास्थ्यकर्मीहरूले यहाँ ठिक हुँदैन भनेका छन् । बाहिर लगेर उपचार गर्ने खर्च हामीसँगै छैन,’ उनले भने, ‘भारतको अस्पतालमा उपचार गर्न रु. एक करोड बढी खर्च लाग्छ भन्ने बुझियो । यत्रो पैसा कसरी जुटाउनु ? सबैले सकेको सहयोग गरेर हाम्रो छोरा प्रिजलको ज्यान बचाइदिन अनुरोध छ ।’
जीवन र मरणको दोसाँधमा रहेका प्रिजलको जीवनरक्षाका लागि सबैले सकेको आर्थिक सहयोग गरिदिनहुन आग्रह गर्दै सामाजिक सञ्जाल फेसबुकमार्फत ‘प्रिजल मगर बचाऔँ’ अभियान सुरु गरिएको छ । प्रिजलको उपचार गर्न परिवारको आर्थिक अवस्थाले नधान्ने भएपछि सहयोग संकलन अभियान सुरु गरिएको अभियानका सदस्य गिरिराज रानामगरले जानकारी दिए।
प्रिजल मगर बचाऔँ अभियानका सदस्यहरूले आफन्त तथा शुभेच्छुकलाई सामाजिक सञ्जालका साथै प्रत्येक्ष भेट गरेर उपचारमा सहयोग गरिदिन अपिल गरिरहेका छन् । आर्थिक सहयोग गर्न चाहनुहुने महानुभावका लागि प्रिजलका बुवा पेसलकुमारको राष्ट्रिय वाणिज्य बैंकमा रहेको खाता नं. २२७०१००००३१९००१० मा रकम जम्मा गर्न सक्नुहुनेछ ।
