भारतको एक अदालतले सामाजिक सञ्जाल एप टेलिग्रामले अस्थायी प्रतिबन्धविरुद्ध गरेको अपिल खारेज गरेको छ । टेलिग्राम र भारतीय अधिकारीबिचको बन्दकोठामा भएको सुनुवाइपछि नयाँदिल्ली उच्च अदालतले प्रतिबन्धविरुद्धको अपिल खारेज गरेको हो ।
केही साताअघि चुहावट भएका परीक्षा प्रश्न बेच्न टेलिग्रामको प्रयोग भइरहेको आरोपमा भारतले उक्त एपलाई ब्लक गरेको थियो । एप ट्र्याकिङ डेटाका अनुसार प्रतिबन्धले टेलिग्रामलाई अफलाइन बनायो र यस हप्ताको सुरुमा एप स्टोरबाट हटाइयो । प्लाटफर्ममा रहेका च्यानलले स्नातक चिकित्सा प्रवेश परीक्षाका प्रश्न बेचेको भारतको सूचना प्रविधि मन्त्रालयले बताएको छ । नक्कली प्रश्नहरूले उम्मेदवारहरूलाई बहकाउन सक्ने मन्त्रालयले जनाएको छ ।
प्रश्नहरू पहिले नै चुहावट गरेको आरोपपछि एक महिनाअघि भारतले परीक्षाको नतिजा रद्द गरेको थियो । यो मुद्दा यस वर्ष विश्वव्यापी प्रविधि कम्पनी र भारत सरकारबिच सबैभन्दा नजिकबाट हेरिएको कानुनी द्वन्द्वमध्ये एक हो ।
दिल्ली उच्च अदालतका न्यायाधीश तेजस कारियाले सरकारले एपमाथि प्रतिबन्ध लगाउने आदेशहरू तर्कसंगत भएको र कानुनी प्रक्रियालाई कडाइका साथ पालना गरेको बताए ।
भारत टेलिग्रामको सबैभन्दा ठुलो बजार हो, जहाँ १५ करोडभन्दा बढी प्रयोगकर्ता छन् । संस्थापक पावेल डुरोभले सार्वजनिक रूपमा प्रतिबन्धको आलोचना गर्दै यसले प्लाटफर्मका प्रयोगकर्तालाई दण्डित गरेको बताए ।
अदालतमा दर्ता भएका फाइलका अनुसार केही दिनसम्म निजी बहसपछि टेलिग्राममाथि प्रतिबन्ध लगाइएको थियो । टेलिग्रामले परीक्षापत्र बेच्ने अकाउन्ट हटाउन पर्याप्त छिटो काम नगरेको भारतीय अधिकारीले आरोप लगाएका छन् । टेलिग्रामले अदालतमा दर्ता गरिएका भारत सरकारको विवरणलाई ‘एकतर्फी र गलत’ तथा जानाजान कम्पनीको सक्रिय प्रक्रियाहरूको विवरण हटाइएको भन्दै अस्वीकार गरेको छ ।
