नेपाली कांग्रेस सुदूरपश्चिम संसदीय दलका नेतासमेत रहेका मुख्यमन्त्री कमलबहादुर शाहलाई दलको नेताबाट हटाउन कांग्रेसका प्रदेश सांसदहरूले संसदीय दलमा अविश्वासको प्रस्ताव दर्ता गरेका छन् । नौजना सांसदको हस्ताक्षरमा संसदीय दलमा आज अविश्वासको प्रस्ताव दर्ता गरिएको सांसद मानबहादुर रावलले बताए । प्रदेश सभामा कांग्रेसका १८ सांसद छन् । त्यसमध्ये प्रकाश देउवा करिब ६ महिनादेखि अमेरिकामा छन् ।
रावलकै अध्यक्षमा बसेको बैठकले हस्ताक्षर संकलन गरेको थियो । मुख्यमन्त्री शाहले काम गर्न नसकेकाले उनलाई दलको नेताबाट मात्र नभई मुख्यमन्त्रीबाटै हटाउन अविश्वासको प्रस्ताव दर्ता गरिएको रावलले बताए । पटकपटक सचेत गराउँदा पनि मुख्यमन्त्रीले आफ्नो कार्यशैली सुधार नगरेको उनले बताए ।
‘मुख्यमन्त्रीले काम गर्न सक्नुभएन। जनतामा राम्रो म्यासेज गएन। कार्यशैली सुधार गर्नुपर्यो । मन्त्रीहरू फेरबदल गरेर राम्रो काम गर्नेलाई बनाऔँ भनेर भन्दै आएका थियौँ,’ रावलले भने, ‘तर, उहाँको कार्यशैली सुधार भएन । कुनै पनि विषयमा सुनुवाइ नभएपछि अविश्वासको प्रस्ताव ल्याउनुपरेको हो ।’
रावलसहित सांसदहरू दिवानसिंह विष्ट, पदमबहादुर शाही, गीताकुमारी चौधरी, तुलसी देवकोटा, डम्मरी महरा, बेलबहादुर रानामगर, ललिता सुनार र जुनाकुमारी दानीले अविश्वासको प्रस्तावमा हस्ताक्षर गरेका छन् । दलमा अविश्वासको प्रस्ताव दर्ता भइसकेको उल्लेख गर्दै उनले अब पार्टी केन्द्रले गर्ने निर्देशनका आधारमा आफूहरू अगाडि बढ्ने बताए । नौजना सांसद विपक्षमा उभिएपछि मुख्यमन्त्रीलाई नैतिक रूपमा पनि पदमा बस्न गाह्रो भएको हस्ताक्षर गर्ने सांसदले बताएका छन् ।
‘मुख्यमन्त्रीबाटै हटाउन खोजेका हौँ । बहुमत सांसद विपक्षमा रहेपछि नैतिक रूपमा पनि पदमा बस्न गाह्रो हुन्छ, तर त्यो उहाँले बुझ्ने कुरा हो,’ रावलले भने ।
