- बिहीबार बसेको मन्त्रिपरिषद्को बैठकले बुधबार जेन–जीसँग भएको सम्झौताअनुसार आयोगको कार्यक्षेत्र थप गरेको हो
जेन–जी आन्दोलनमा भएको मानवीय तथा भौतिक क्षतिबारे छानबिन गर्न गठन भएको जाँचबुझ आयोगको कार्यक्षेत्र थप भएको छ । बिहीबार बसेको मन्त्रिपरिषद्को बैठकले बुधबार जेन–जीसँग भएको सम्झौताअनुसार कार्यक्षेत्र थप गरेको हो ।
जसअनुसार आयोगले जेन–जी आन्दोलनका क्रममा पक्राउ परेकाहरूको हकमा पनि छानबिन गर्ने भएको छ । कतिपय जेन–जी अगुवाले आन्दोलनमा सहभागी भएकै आधारमा हाल प्रहरीले पक्राउ गरेर मुद्दा चलाएको भन्दै सरकारप्रति असन्तुष्टि जनाएपछि त्यसउपर जाँचबुझ आयोगमार्फत छानबिन गर्न लागेको छ । बुधबार भएको सम्झौतामा ‘जाँचबुझ, सत्य निरूपण तथा मेलमिलापको मान्यतालाई ध्यानमा राखी उपयुक्त प्रक्रिया अपनाई जनआन्दोलनको प्रकृति तथा २३ र २४ भदौको विशिष्ट परिस्थितिजन्य अवस्थालाई दृष्टिगत गरी जनआन्दोलनका क्रममा भएका घटना र अन्य व्यक्ति वा समूहले आपराधिक मनसायका साथ सुनियोजित तथा संगठित तरिकाले गरेका हिंसात्मक कार्यहरूको भेदलाई पूर्वाग्रहरहित रूपमा छुट्याई छानबिन गरी प्रतिवेदन पेस गर्ने’ उल्लेख थियो । जसअनुसार कोही निर्दाेष देखिएमा उनीहरूको मुद्दा फिर्ता लिन सिफारिस गर्ने काम आयोगले गर्ने पनि सम्झौतामा उल्लेख छ । सोही सम्झौताअनुसार आयोगको कार्यक्षेत्र थप गरिएको सञ्चार तथा सूचना प्रविधिमन्त्री जगदीश खरेलले बताए ।
कार्यक्षेत्र थप भएको आयोगको म्याद भने दुई हप्ता मात्र बाँकी छ । तीन महिनाको म्यादसहित गठन भएको आयोगले गत ९ असोजमा काम थालेको थियो । आगामी ९ पुसमा म्याद सकिँदै छ । यसअघिकै कार्यदेशअनुसारको काम नसकिएको अवस्थामा कार्यदेश थप भएपछि समय नपुग हुन सक्ने आयोगका एक अधिकारी बताउँछन् ।
तत्कालीन गृहसचिव र आइजिपीसँग बयान
जाँचबुझ आयोगले तत्कालीन गृहसचिव गोकर्णमणि दुवाडी र तत्कालीन आइजिपी चन्द्रकुबेर खापुङसँग बयान लिन थालेको छ । बिहीबारदेखि उनीहरूको बयान सुरु भएको हो । उनीहरूको तीन–चार दिन लाग्न सक्ने आयोगका एक अधिकारी बताउँछन् । दुवैजनाले हाल अवकाश पाइसकेका छन् ।
यस्तै, नेपाल प्रहरीका बहालवाला आइजिपी दानबहादुर कार्कीलाई पनि शुक्रबार बयानमा बोलाइएको छ । कार्की २४ भदौको जेन–जी आन्दोलनमा काठमाडौं उपत्यका प्रहरी कार्यालयको प्रमुख थिए ।
गृहसचिव र आइजिपीको सकिएपछि आगामी साता तत्कालीन गृहमन्त्री रमेश लेखक र तत्कालीन प्रधानमन्त्री केपी शर्मा ओलीको बयान लिने आयोगको तयारी छ ।
