भैरहवा भन्सार कार्यालय रुपन्देहीले दुई करोडभन्दा बढीको भन्सार छलेका सामान बरामद गरेको छ । आफ्नै कार्यक्षेत्रभन्दा बाहिर भन्सार छली गरेको सामान भन्सार विभागसँगको समन्वयमा बरामद गरिएको प्रमुख भन्सार अधिकृत मनिराम पौडेलले जानकारी दिए । कपिलवस्तुको चाकर चौराह मायादेवीबाट पाँचवटा पिकअपबाट सामान तस्करी हुँदै गरेको भन्ने सूचनाका आधारमा बुटवलबाट एउटा पिकअप नियन्त्रणमा लिएको उनले बताए ।
‘सूचनालाई पछ्याउँदै जाँदा कार्यक्षेत्रभन्दा पनि बाहिर पुग्नुपर्ने अवस्थामा भन्सार विभागसँग समन्वय गरेर पुगेका थियौँ,’ पौडेलले भने । यस्तै, अर्को गाडी पकडीमा नियन्त्रणमा लिएपछि बाँकी तीनवटा पिकअप तितरबितर भएका थिए । अर्को सूचनाका आधारमा तिनलाई पनि नियन्त्रणमा लिएको पौडेलको भनाइ छ । बरामद गरिएका सामान भन्सार कार्यालय ल्याएको भन्सार अधिकृत पौडेलले बताए ।
बरामद सामानमा लत्ताकपडा, जुत्ताचप्पल, खैनी सुर्ती, खेलौना, अबिर आदि रहेका छन् । यसअघि पनि रुपन्देहीकै सैनामैनाबाट पिकअपमा सामान ओसारपसार गरिरहेको अवस्थामा नियन्त्रणमा लिइएको थियो ।