जिल्लाका अधिकांश ग्रामीण सडकमा पहिरो गएकाले मानिसहरू जहाँको तहीँ ठप्प भएका छन्
लगातार आएको वर्षाका कारण अर्घाखाँचीको जनजीवन प्रभावित भएको छ । दसैँ मनाउन विभिन्न ठाउँबाट घर आएका मानिस गन्तव्यमा फर्किन सकेका छैनन् । यहाँका धेरैजसो ग्रामीण सडक पहिरोले अस्तव्यस्त बनेका छन्। निरन्तरको वर्षाले विद्युत् आपूर्तिमा समेत अवरोध गरेको छ । मोबाइल चार्ज गर्न विद्युत् नहुँदा मानिस टेलिफोन सम्पर्कबाट समेत विच्छेद भएका छन् । वर्षाको कारण मानिस मात्र नभएर पशुचौपाया पनि प्रभावित भएका छन्।
पहिरो तथा भूक्षय उच्च जोखिम घरपरिवारलाई सुरक्षित ठाउँमा स्थानान्तरण
पहिरोको उच्च जोखिमका कारण अर्घाखाँचीमा ३४ घरपरिवारलाई सुरक्षित स्थानमा स्थानान्तरण गरिएको छ । घरआसपासको जमिन चर्किने, घरमाथिबाट ढुंगा पल्टिने, लेदो बग्ने भएपछि ३४ घरपरिवारका एक सय ४८ जनालाई स्कुल, स्वास्थ्य चौकी र आफन्तको घरमा सारिएको प्रहरीले जनाएको छ ।
सन्धिखर्क नगरपालिका- ६ जगातका तीन घरपरिवार, छत्रदेव गाउँपालिकाका १० घरपरिवार र पाणिनी गाउँपालिका- ८ को एक घरपरिवारलाई सुरक्षित स्थानमा सारिएको प्रहरीले जानकारी दिएको छ । यसैगरी मालारानी- ६ का २० घरपरिवारलाई समेत सुरक्षित स्थानमा सारिएको जिल्ला प्रहरी कार्यालयका सूचना अधिकारी कृष्ण घिमिरेले जानकारी दिए।
सडक अवरुद्ध हुँदा समस्या
सन्धिखर्क-गोरुसिंगे सडकमा ठाउँ-ठाउँमा पहिरो गए पनि आंशिक रूपमा सडक खुला भएको छ । यस सडकखण्डको घुम्ती र जगातमा पहाड नै खसेकाले सडक पूर्ण रूपमा सञ्चालन हुन सकेको छैन । सडकमा खसेको पहिरो हटाएको केही समयमा नै पुन: लेदोमाटो झर्ने क्रम नरोकिएकाले नियमित रूपमा सडक सञ्चालन हुन समय लाग्ने जिल्ला प्रहरी कार्यालय अर्घाखाँचीले जनाएको छ ।
जिल्लाका अधिकांश ग्रामीण सडकमा पहिरो गएकाले मानिसहरू जहाँको तहीँ ठप्प भएर बसेका छन् । पहिरोले गर्दा ग्राीण सडकमा गाडी चल्न सकेका छैनन्। सदरमुकाम सन्धिखर्कबाट गाउँ जाने सबै सडक अवरुद्ध छन्। भूमिकास्थान, शितगंगा र मालारानीका केही स्थानमा पोल ढल्दा आंशिक रूपमा विद्युत् अवरुद्ध भएको छ।
खोलाले बगाएका बालक अझै बेपत्ता
बुधबार खोलाले बगाएका एकजना बालक अझै बेपत्ता छन् । सन्धिखर्क- ७, किटेनीका १० वर्षीय बालक समीर पौडेललाई मामाघर जाने क्रममा स्थानीय फर्ज्याङ खोलाले बगाएको थियो। बुधबारदेखि बेपत्ता भएका बालककाे खोजीकार्य जारी छ । तैपनि फेला पार्न नसकिएको प्रहरीले जनाएको छ।नेपाल प्रहरी, सशस्त्र प्रहरी र नेपाल आर्मीको टोली परिचालन गरेर खोजी गरे पनि बेपत्ता भएका बालक अझै फेला परेका छैनन् ।
लगातारको अविरल वर्षाको कारण जोखिम बढेपछि अत्यावश्यक काममा बाहेक हिँडडुल तथा यात्रा नगर्न जिल्लावासीलाई जिल्ला प्रहरी कार्यालय अर्घाखाँचीले अनुरोधसमेत गरेको छ। गएरातिदेखि भने वर्षा राेकिएकाे छ।