मुख्य समाचार डिजिटल संस्करण

राज्य व्यवस्था बेथिति र विसंगतिको पुलिन्दा बन्यो : अध्यक्ष लिङ्देन

राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले राज्य व्यवस्था बेथिति र विसंगतिको पुलिन्दा बनेको आरोप लगाएका छन्। बिहीबार काठमाडौंमा बसेको पार्टीको केन्द्रीय समितिको बैठकलाई सम्बोधन गर्दै लिङ्देनले यस्तो बताएका हुन्।

नेपालमा विदेशी चलखेल बढ्दै गएको भन्दै उनले सत्तारुढ ठूला दलको अकर्मण्यता र असफलताका कारण राष्ट्रियता संकटमा परेको आरोप लगाए। अध्यक्ष लिङ्देनले विदेशीसामु प्रमुख दलहरूले अनुसरण गरेको लम्पसारवादको नीतिले नेपाल विदेशी हस्तक्षेपको खेल मैदान बनेको जिकिर गरे। सरकारले असन्तुलन र अराजकतालाई प्रोत्साहन गरेको उनको आरोप छ।

‘सत्तारुढ ठूला दलका अकर्मण्यता र असफलताका कारण राष्ट्रियता संकटमा छ। विदेशी चलखेल र प्रभाव दिनदिनै बढिरहेको छ। विदेशीसामु प्रमुख दलहरूले अनुसरण गरेको लम्पसारवादको नीतिले नेपाल विदेशी हस्तक्षेपको खेल मैदान बनेको छ। सरकारले असन्तुलन र अराजकतालाई प्रोत्साहन गरेको छ । अस्थिरताको बाटो सिर्जना गरेको छ। भूराजनीतिक सन्तुलन गुमेको छ । नेपाल शक्तिराष्ट्रहरूको रणनीतिक प्रतिस्पर्धाको थलो बनेको छ,’ उनले भने।

अध्यक्ष लिङदेनले नेपाल आर्थिक संकटमा रहेको भन्दै यस्ता वेला नेपालमाथि अर्को संकट आइलाग्न सक्ने खतरा बढेको बताए। उनले सत्तासीन दलहरू कानमा तेल हालेर कुर्सी जोगाउने र सत्तामा टिकिरहने अंक गणितमा व्यस्त रहेको आरोप लगाए।