समाचार डिजिटल संस्करण

एक हजार व्यक्तिलाई रोजगारी दिने बागमती गाउँपालिका अध्यक्षका उम्मेदवारको वाचा

ललितपुरको बागमती गाउँपालिकाको अध्यक्षका लागि एमालेका उम्मेदवारले एक हजार युवालाई रोजगारी दिने वाचा गरेका छन्। कान्ति लोकपथसँगै जोडिएको यो गाउँपालिकामा गठबन्धन र एमालेका उम्मेदवारबीच चुनावी प्रतिस्पर्धा हुँदै छ ।

मतदातहरूसँग अन्तर्क्रिया गर्दै गाउँपालिका अध्यक्षका एमाले उम्मेदवार रमेश सञ्जेलले एक हजार युवालाई रोजगारी दिने वाचा गरेका हुन् । गाउँपालिकाको वडा नम्बर ३ भट्टेडाँडाका आयोजित कार्यक्रममा सञ्जेलले भने, ‘हामी हरेक व्यक्तिलाई कामसँग जोड्छौँ। आगामी पाँच वर्षमा एक हजार युवालाई रोजगारीमा जोड्छौँ।’

गाउँपालिकाका युवालाई कृषि कर्ममा सक्रिय बनाउने योजना उनले सुनाए । ‘अहिले हाम्रो गाउँपालिकाबाट दैनिक ८ देखि ९ हजार लिटर दूध उपत्यकामा आउँछ। अबको पाँच वर्षमा यो संख्या हामी दोब्बर बनाउँछौँ,’ उनले भने ।

राजधानीसँगै जोडिएर पनि बागमती गाउँपालिका विकट मानिन्छ। ललितपुरको दक्षिणी भेगमा रहेको यो गाउँपालिकामा ०७४ को निर्वाचनमा नेपाली कांग्रेस विजयी भएको थियो । अहिले गाउँपालिका अध्यक्षमा गठबन्धनले कांग्रेसका वीरबहादुर लोप्चनलाई अघि सारेको छ।

एमाले उम्मेदवारले मतदातासँग उच्च शिक्षाका लागि काठमाडौं उपत्यका आउनुपर्ने अवस्थाको पनि अन्त्य गर्ने सञ्जेलको वाचा छ। ‘पढ्न र रोजगारीका लागि अझै पनि उपत्यका आउनुपर्ने बाध्यता छ,’ उनले भने, ‘हामीले जितेपछि यो अवस्था हटाउँछौँ । गाउँमै उच्च शिक्षा र पर्याप्त रोजगारीको व्यवस्था गर्छौँ ।’

गाउँपालिकालाई पर्यटकीय क्षेत्र बनाउने र उपत्यकाबाट आन्तरिक पर्यटक भित्र्याउने उनको योजना छ। आर्थिक सुशासनमा पारदर्शी हुने र जिल्लाको दक्षिणी क्षेत्रमा हुने ढुंगा, बालुवा उत्खननलाई व्यवस्थित बनाउने सञ्जेलले वाचा गरेका छन् ।