बाग्लुङको निसी खोलामा पिकअप जिप दुर्घटना हुँदा एकजनाको मृत्यु भएको छ । मध्यपहाडी लोकमार्गअन्तर्गतको निसी खोला गाउँपालिका–२ खाडुमा जिप दुर्घटना भएको हो ।
दुर्घटनामा परी ढोरपाटन नगरपालिका- १ का ४७ वर्षीय ऋतुवर्ण पौडेलको मृत्यु भएको जिल्ला प्रहरी कार्यालय बाग्लुङका प्रवत्ता डिएसपी इकवाल हवारीले जानकारी दिए ।
मंगलबार साँझ करिब ७ बजे निसी खोला गाउँपालिकाबाट बुर्तिबाङ बजार फर्कँदै गरेको लु १ त ९४८० नम्बरको पिकअप जिप सडकबाट झन्डै १५० मिटर तल खोलामा खसेको थियो । जिपधनीसमेत रहेका पौडेलले आफैँ गाडी चलाएको प्रहरीले जनाएको छ ।
दुर्घटनामा रुपन्देहीस्थित तिलोत्तम नगरपालिका- ७ का ३८ वर्षीय सुरेश थापा गम्भीर घाइते भएका छन् । घाइतेको उपचारका लागि बुर्तिबाङ प्राथमिक स्वास्थ्य केन्द्रमा ल्याइएको छ ।
मृतक पौडेल नेकपा एमाले ढोरपाटन नगरपालिकाका अध्यक्ष हुन् । उनले लामो समय स्वास्थ्यकर्मीको रूपमा काम गरेका थिए ।