- वि.सं २o७८ भदौ १७ बिहीबार
बलिउड अभिनेता सिद्धार्थ शुक्लाको हृदयघातका कारण मृत्यु भएको छ। ४० वर्षीय शुक्लाको मुम्बईस्थित अस्पतालमा उपचारका क्रममा मृत्यु भएको भारतीय सञ्चारमाध्यमले जनाएका छन्। समाचारहरूमा जनाइएअनुसार बुधबार राति उनले औषधि सेवन गरेर सुतेका थिए। उनको शरीरमा कुनै बाहिरी चोट नपाइएको चिकित्सकहरूले बताएका छन्।
मोडलका रूपमा आफ्नो करिअर सुरु गरेका शुक्ला सन् २००५ मा ‘वर्ल्ड बेस्ट मोडल’ घोषित भएका थिए। उनले ‘ब्रोकन बट ब्युटिफुल–३’, ‘बालिका वधु’ र ‘दिल से दिल तक जस्ता सिरियलहरूमा अभिनय गरेका थिए।
‘सावधान इन्डिया’ र ‘इन्डिया गट ट्यालेन्ट’जस्ता रियालिटी शो होस्ट गरिसकेका शुक्लाले ‘फियर फ्याक्टर सिजन ७’ र ‘बिग बोस सिजन १३’ को उपाधि जितेका थिए।
