- वि.सं २o८१ बैशाख २१ शुक्रबार
दोलखाको कालिञ्चोक गाउँपालिकाले आयोजना गरेको अन्तरपालिका स्तरीय भलिबल प्रतियोगिताको उपाधि कालिञ्चोक ‘ए’ले जितेको छ । प्रतियोगितामा कालिञ्चोक गाउँपालिका ‘ए’ प्रथम, गौरीशंकर गाउँपालिका द्वितीय, बिगु गाउँपालिका तृतीय र कालिञ्चोक गाउँपालिका ‘डी’ चतुर्थ भएको कालिञ्चोक गाउँपालिकाका खेलकुद विकास समिति प्रमुख सुभास थामीले जानकारी दिए । उनका अनुसार प्रथम हुनेलाई एक लाख, द्वितीयलाई ७० हजार, तृतीयलाई ५० हजार र चतुर्थ हुनेलाई ३० हजार नगदसहित सिल्ड, मेडल, ट्रफी र प्रमाणपत्र उपलब्ध गराइएको छ ।
प्रतियोगितामा बेस्ट ब्लकर कृष्ण थापा र बेस्ट सर्भर हरिवंश सोढारीलाई समेत पुरस्कृत गरिएको कालिञ्चोक गाउँपालिकाका अध्यक्ष बिनकुमार थामीले जानकारी दिए । गाउँपालिकाका अध्यक्ष थामीले खेलकुदको क्षेत्रबाट पनि समाज विकासमा सहयोग हुने भन्दै प्रतियोगिताको आयोजना गरेको बताउँदै खेल क्षेत्रको विकासका निम्ति गाउँपालिकाले प्राथमिकताका साथ योजना निर्माण गरी कार्यान्वयन गर्ने बताए ।
प्रतियोगिताको समापन समारोहमा जिल्ला समन्वय समिति दोलखाका संयोजक डबल पाण्डे, कालिञ्चोक गाउँपालिका अध्यक्ष बिनकुमार थामी, जिल्ला खेलकुद विकास समितिका अध्यक्ष रोहितचन्द्र खड्कालगायतले धारणा राखेका थिए ।
दोलखाका नौवटा स्थानीय तहसहित १२ वटा समूहले सहभागिता जनाएको प्रतियोगिताको उद्घाटन बागमती प्रदेश सभाका सांसद पशुपति चौलागाईंले उद्घाटन गरेका थिए ।
