सिंगल्स डे : चिनियाँले एक सय अर्ब डलरभन्दा बढीको सामान खरिद गरे
सन् २०२० को ‘सिंगल्स डे’ (१–११ नोभेम्बर) सपिङ मेलाका अवसरमा चिनियाँ उपभोक्ताले एक सय अर्ब डलरभन्दा बढीको सामान खरिद गरेका छन् । कोरोना भाइरस महामारीका कारण संकट झेलिरहेको चिनियाँ अर्थतन्त्रमा सुधार आएको संकेत पनि यसले देखाएको अनुमान गरिएको छ ।
गत १ नोभेम्बरदेखि ११ दिनसम्म भएको यस मेलामा टाओबाओ र टिमलबाट ७५ अर्ब डलरबराबरको सामान बिक्री भएको छ। यी दुवै इकमर्स प्लेटफर्म चीनको सबैभन्दा ठूलो इकमर्स कम्पनी अलिबाबाले सञ्चालन गरेको हो ।
पछिल्लो २४ घन्टामा मात्र ३८ अर्ब ४० करोड डलरबराबरको सामान बिक्री भएको अलिबाबाले जनाएको छ । अर्को प्रतिस्पर्धी चिनियाँ कम्पनी जेडी डटकमले पनि ४० अर्ब ९० करोड डलरबराबरको सामान बिक्री गरेको छ ।
विश्वमै सबैभन्दा ठूलो सपिङ मेला ठानिएको चिनियाँ सिंगल्स डे मेला पछिल्ला वर्षहरूमा निकै लोकप्रिय भइरहेको छ । यस मेलामा उपभोक्ताले विभिन्न किसिमका सामानमा भारी छुट पाउने गर्छन् जसमा सामान्य घरायसी सामानदेखि बहुमूल्य वस्तु पनि राखिएका हुन्छन् ।
यस मेलामा साना खुद्रा पसलेदेखि ठूला र विश्व प्रसिद्ध ब्रान्डका सामान पाइन्छन् । एप्पल, नाइक र लोरियल समेतका लोकप्रिय ब्रान्डका सामान पनि अनलाइनमा सस्तो र भारी छुटमा पाइने गर्छ । यस प्रकारको मेला सन् २००९ देखि सुरु भएको हो । अमेरिकामा सञ्चालित ब्लाक फ्राइडे र साइबर मन्डे मेला झैँ सिंगल्स डे चीनमा लोकप्रिय छ ।