Skip This
गण्डकी प्रदेशमा थप एक कोरोना संक्रमितको निधन भएको छ ।
निधन हुनेमा सशस्त्र प्रहरी बल मुस्ताङमा कार्यरत एक सशस्त्र प्रहरी रहेको गण्डकी प्रदेश स्वास्थ्य निर्देशनालयले जानकारी दिएको छ ।
निर्देशनालयका निर्देशक डा. विनोदबिन्दु शर्माका अनुसार बाग्लुङको ढोरपाटन नगरपालिका– ७ का २५ वर्षीय उनको पोखराको मणिपाल शिक्षण अस्पतालमा उपचारको क्रममा निधन भएको हो ।
उनलाई २५ असोजमा मणिपाल शिक्षण अस्पतालमा भर्ना गरिएको थियो । उनलाई २७ असोजमा कोरोना संक्रमण पुष्टि भएको थियो ।
योसहित गण्डकी प्रदेशमा कोरोना संक्रमणबाट निधन हुनेको संख्या ४८ पुगेको छ ।
यसैबीच गण्डकी प्रदेशमा थप ३७ जनामा कोरोना संक्रमण पुष्टि भएको छ ।
यसअगाडि शुक्रबार बिहान मात्रै ७८ जनामा कोरोना संक्रमण पुष्टि भएको थियो ।
यी सबै गरेर अहिलेसम्म गण्डकीमा कोरोना संक्रमितको संख्या पाँच हजार चार सय ७१ पुगेको छ ।
