राष्ट्रिय महिला टोलीमा पूजाको फड्को

• दुई वर्षअघि डेब्यु गरेकी युवा अलराउन्डर पूजा महतोले मे महिनामा थाइल्यान्डमा हुने आइसिसी टी–२० विश्वकप एसियन छनोटमा नेपालको उपकप्तानी गर्ने

नेपाली राष्ट्रिय महिला क्रिकेट टोलीमा युवा खेलाडी पूजा महतोले फड्को मारेकी छिन् । नेपाल क्रिकेट संघ (क्यान)ले आगामी मे महिनामा थाइल्यान्डमा हुने आइसिसी महिला टी–२० विश्वकप एसिया क्वालिफायरका लागि टोली घोषणा गर्दा पूजाले उपकप्तानको जिम्मेवारी पाएकी छिन् । उनी यू–१९ टोली कप्तानसमेत हुन् । क्यानले नियमित कप्तान इन्दु वर्माको नेतृत्वमा शुक्रबार १४ सदस्यीय अन्तिम टोली घोषणा गरेको हो । क्यानले दोस्रो चरणको प्रशिक्षणमा रहेका २० खेलाडीबाट अन्तिम टोली घोषणा गरिएको हो ।

विन्दु रावल, सम्झना खड्का, रुबिना क्षेत्री, रोमा थापा, कविता जोशी, रुबी पोदार, राजमती ऐरी, कविता कुँवर, सबनम राई, ईश्वरी विष्ट, मनीषा उपाध्याय र रिया शर्माले एसियन विश्वकप खेल्नेछन् । अन्तिम चरणमा काजल श्रेष्ठ, सोमु विष्ट, यशोदा विष्ट, सीता रानामगर, सिमाना केसी र रचना चौधरीले भने स्थान बनाउन सकेनन् । 

क्यानले नेपालले युगान्डामा भएको चारदेशीय टी–२० आई सिरिजका क्रममा प्रतिस्पर्धा गरेका पाँच खेलाडीले यसपटकको राष्ट्रिय टोलीमा स्थान बनाउन सकेनन् । युगान्डामा सिरिज खेलेका सना प्रबिन, ममता चौधरी, एलिशा यादव र रचना चौधरी बाहिरिएका छन् । युगान्डा सिरिज गुमाएकी कविता कुँवरसहित चार खेलाडीले पुनरागमन गरेका छन् । रुबी, मनीषा र सबनम राष्ट्रिय टोलीमा फर्किएका छन् । 

थाइल्यान्डमा ७ देखि २१ मेसम्म एसिया क्वालिफायर हुनेछ । जसमा नेपालसहित नौ टोलीले प्रतिस्पर्धा गर्नेछन् । नेपाल रहेको समूह ‘सी’मा बहराइन र हङकङ छन् । नेपालले ९ मे, १३ मेमा हङकङ र १५ मा बहराइको सामना गर्नेछ । छनोट चरणका शीर्ष दुई टोली ग्लोबल क्वालिफायरमा पुग्नेछन् । ग्लोबल क्वालिफायरमा १० टोलीले प्रतिस्पर्धा गर्नेछन् । शीर्ष चार टोली अर्को वर्ष जुन–जुलाईमा इंग्ल्यान्डमा हुने आइसिसी महिला टी–२० विश्वकपमा छनोट हुनेछ ।

दुई वर्षअघि राष्ट्रिय टोलीमा डेब्यु 
नयाँ उपकप्तान बनेकी पूजाले दुई वर्षअघि क्वालालम्पुरमा हङकङविरुद्ध राष्ट्रिय टोलीमा डेब्यु गरेकी थिइन् । उनले अहिलेसम्म सिनियर टोलीबाट ३२ खेलमध्ये २६ इनिङ्समा चार सय नौ रन बनाएकी छिन् । यस क्रममा उनले दुई अर्धशतकीय इनिङ्स खेलेकी छिन् । अलराउन्ड भूमिका राम्रोसँग निर्वाह गर्न सक्ने पूजाले ३१ टी–२० आई इनिङ्समा २६ विकेट हात पारेकी छिन् । सन् २०२४ मा उनले माल्दिभ्सविरुद्ध ५९ रनको अर्धशतकीय इनिङ्स खेलेकी थिइन् ।

यस वर्ष उनले नेदरल्यान्ड्सविरुद्धको प्रतिस्पर्धामा ६२ रन बनाएकी थिइन् । एसियाली भूमिमा उनको ब्याटिङ राम्रो छ । उनले अहिलेसम्म २६ खेलमध्ये २० इनिङ्समा तीन सय १९ रन बनाएकी छिन् । उनले करिअरमा बनाएको दुई अर्धशतक पनि एसियाली मैदानमै थियो । सन् २०२५ को सिजनमा उनको ब्याटिङ चलिरहेको छ । २२.४० को स्ट्राइकमा उनले ब्याटिङ गरिरहेकी छिन् ।