सर्लाहीको ब्रह्मपुरीमा करेन्ट लागेर खेत जोत्दै गरेका ट्रयाक्टरचालकको ज्यान गएको छ । शुक्रबार बिहान चैतेधान रोप्न खेत बनाउँदै गर्दा पानी तान्ने मोटरबाट करेन्ट लागेर खेत ट्रयाक्टरचालकको ज्यान गएको प्रहरीले जनाएको हो ।
प्रहरीका अनुसार ज.१त ४११४ नम्बरको ट्रयाक्टरचालक ब्रह्मपुरी गाउँपालिका– २ निवासी २७ वर्षीय राजेश पासवानको करेन्ट लागेर मृत्यु भएको हो । चालक पासवानलाई खेतमा पानी पटाइरहेको मोटरबाट करेन्ट लागेको थियो ।
करेन्ट लागेर गम्भीर बनेका पासवानलाई तत्काल उपचारका लागि प्रादेशिक अस्पताल मलंगवा पुर्याएपछि चिकित्सकले मृत घोषणा गरेका जिल्ला प्रहरी कार्यलय सर्लाहीका सूचना अधिकारी एवं प्रहरी नायब उपरीक्षक दीपक श्रेष्ठले जानकारी दिए । पासवानको शव परीक्षणका लागि प्रादेशिक अस्पतालमा राखिएको र घटनाको थप अनुसन्धान भइरहेको प्रहरी नायब उपरीक्षक श्रेष्ठले बताए ।