Skip This
सर्लाहीको मलंगवा नगरपालिकाबाट प्रहरीले ५३ राउन्ड गोली बरामद गरेको छ। बिहीबार मलंगवा– ८ गोरखकालीनजिकैबाट लुकाएर राखेको अवस्थामा ५३ राउन्ड गोली बरामद भएको प्रहरीले जनाएको छ।
स्थानीय चन्द्रभूषण यादवको घरअगाडि खाल्डो खनेर गाडेको अवस्थामा गोली रहेको सूचना पाएपछि जिल्ला प्रहरीको टोली उक्त स्थानमा पुगेको थियो। खानतलासी गर्ने क्रममा यादवको घर भाडा लिएर ईश्वरपुर नगरपालिका– ५ निवासी विजय महतोले सञ्चालन गरेको मोटरसाइकल वर्कसपको कवाड सामान राखेको ठाउँबाट गोली बरामद भएको हो।
गोली सुन प्याक गर्ने पर्समा राखेर ६–७ इन्च गहिरो खाल्डो खनेर पुरेको अवस्थामा भेटिएको जिल्ला प्रहरी कार्यालय सर्लाहीका सूचना अधिकारी एवं प्रहरी नायव उपरीक्षक दीपक श्रेष्ठले जानकारी दिए।
घटनास्थलबाट केएफ ७.६५ लेखिएको गोली बरामद भएको प्रहरीले जनाएको छ। बरामद गोलीको विषयमा प्रहरीले थप अनुसन्धान थालेको छ।
