- वि.सं २o८१ जेठ २ बुधबार
कांग्रेस सांसद एवं अर्बपति व्यापारी विनोद चौधरीले आफ्नो चरित्रको प्रमाणपत्र कसैलाई बुझाउन नपर्ने प्रतिक्रिया दिएका छन् ।
बाँसबारी छालाजुत्ता कारखानाको १० रोपनी जग्गा हिनामिना प्रकरणमा आज बिहान सरकारी वकिलको कार्यालयमा बयान दिएर बाहिरिने क्रममा उनले सञ्चारकर्मीहरूसँग आफ्नो चरित्रको प्रमाणपत्र कसैलाई बुझाउन नपर्ने प्रतिक्रिया दिएका हुन् । नेपाल प्रहरीको केन्द्रीय अनुसन्धान ब्युरो (सिआइबी)ले बोलाएपछि उनी सरकारी वकिलको कार्यालयमा बयान दिन पुगेका थिए ।
‘सिआइबीले मलाई यहाँ आउन मौखिक जानकारी गराएको थियो । म एउटा जिम्मेवार व्यक्ति, जिम्मेवार राजनीतिकर्मी भएको नाताले म यहाँ सहयोग गर्न उपस्थित भएँ,’ उनले भने । सांसद चौधरीले व्यवसायीलाई ‘स्टन्टबाजी गर्नेखालका गतिविधिबाट टाढा राख्नुपर्ने पनि बताए ।
उनले आफूले सबै कुरा राखेर आएको भन्दै व्यवसायीलाई यस्ता प्रकारका गतिविधिबाट टाढा राख्नुपर्ने बताए । ‘यो जटिल परिस्थितिमा मजत्तिको मान्छे यहाँ उभिएर यसो भनिरहँदा विश्वकरका व्यवसायीलाई के सन्देश जाला ?,’ उनले भने, ‘मेरो ४५ वर्षको व्यावसायिक यात्राको चारित्रिक सर्टिफिकेट कसैलाई बुझाउनुपर्दैन । खासगरी स्टन्टबाजी गर्नेहरूलाई ।’
बाँसबारी छालाजुत्ता कारखानाको १० रोपनी जग्गा हिनामिना प्रकरणमा सांसद चौधरीमाथि अनुसन्धान भइरहेको भन्दै हिजो सिआइबीले संसद् सचिवालयमार्फत सभामुख देवराज घिमिरेलाई जानकारी गराएको थियो ।
त्यसको भोलिपल्ट सिआइबीले जिल्ला सरकारी वकिलको कार्यालयमा चौधरीसँग बयान लिएको हो । अर्बपति उद्योगी चौधरी प्रतिनिधिसभामा कांग्रेसको तर्फबाट प्रत्यक्ष निर्वाचित सांसद हुन् ।
तत्कालीन बाँसबारी छाला तथा जुत्ता कारखानाको १० रोपनी जग्गा चौधरी समूहले ०४३ मा हडपेको थियो । उक्त जग्गामा समूहले सिजी चाँदबाग स्कुल चलाइरहेको छ ।
अनुसन्धानका क्रममा सिआइबीले विनोद चौधरीका भाइ अरुण, तत्कालीन बाँसबारी छालाजुत्ता कारखाना लिमिटेडका कार्यकारी अध्यक्ष अजितनारायणसिंह थापा र सिजी चाँदबाग रेसिडेन्सी प्रालिका सञ्चालक सञ्जय ठाकुरलाई गत १८ माघमै पक्राउ गरेको थियो । ६ दिनको हिरासतपछि उनीहरूलाई हाजिरी जमानीमा छाडिएको छ ।
2024-05-15-05-45-50.jpeg)
2024-05-15-05-45-50.jpeg)
