पछिल्लो केही वर्षयता मधेश प्रदेशमा डुबेर मृत्यु हुनेको संख्या बढ्दै गएको छ । नेपाल मधेश फाउन्डेसन (नेमाफ) ले आइतबार सार्वजनिक गरेको एक प्रतिवेदनमा ०७२ देखि ०७८ सम्म चार सय पाँचजनाको डुबेर मृत्यु भएको छ । पानीमा डुबेर सबैभन्दा बढी बालकको मृत्यु भएको छ ।
प्रतिवेदनअनुसार मृत्यु हुनेमा बालक ३४३, बालिका २१३, पुरुष २३५ र महिला ८५ छन् । पानीमा डुबेर मृत्यु हुने ३३४ बालकमध्ये १० वर्षमुनिको संख्या १५४ रहेको प्रतिवेदनमा उल्लेख छ । गत वर्ष मधेस प्रदेशमा डुबेर १५५ जनाको मृत्यु भएको थियो ।
चालू आर्थिक वर्षको माघ मसान्तसम्म ८० जनाको डुबेर मृत्यु भएको नेमाफले सार्वजनिक गरेको तथ्यांकमा उल्लेख छ । जनता समाजवादी पार्टीका मधेश प्रदेशका प्रमुख सचेतक रामआशिष यादवले सरकार र ठेकेदारको लापरबाहीका कारण बर्सेनि पानीमा डुबेर मृत्यु हुनेको संख्या बढ्दै गएको बताए । ठेकेदारले सडक बनाउने नाममा माटो खन्ने र त्यो खाल्डो नभर्नेलगायत कारण पानीमा डुबेर बालबालिकाको मृत्यु हुने घटना बढेको उनको भनाइ छ ।