- वि.सं २o८१ बैशाख १७ सोमबार
बंगलादेशको ढाकामा जारी साफ यू–१९ महिला च्याम्पियनसिप– २०२४ मा नेपालले भुटानमाथि १–० को जित निकालेको छ ।
बिएसएसएस रंगशालामा सेनु परियारको निर्णायक गोलमा नेपालले भुटानविरुद्ध जित निकालेको हो । पहिलो खेलमा आयोजक बंगलादेशसँग ३–१ गोलअन्तरले पराजित भएको नेपालले दोस्रो खेल जित्दै महत्वपूर्ण तीन अंक आर्जन गरेको छ ।
५४औँ मिनेटमा सेनुले सुक्रिया मियाले निकालेको बललाई भुटानकी गोलरक्षक पेमा याङजोमलाई बिट गर्दै बललाई जाली चुमाइन् । जितसँगै नेपालले फाइनल पुग्ने सम्भावना जीवितै राखेको छ ।
पहिलो खेलमा भारतसँग १०–० को विशालअन्तरको पराजय व्यहोरेको भुटान भने दोस्रो पराजयपछि प्रतियोगिताबाट बाहिरिएको छ ।
आजै भएको खेलमा बंगलादेशले भारतलाई १–० ले पराजित गरेको छ । लगातार दोस्रो जितपछि बंगलादेश ६ अंकसहित तालिकाको शीर्ष स्थानमा रहेको छ । यता, भारतको पनि दुई खेलबाट तीन अंक मात्र भएको छ । अन्तिम खेलमा नेपालले भारतलाई हराउन सके नेपाल प्रतियोगिताको फाइनलमा प्रवेश गर्नेछ ।
