विश्व डिजिटल संस्करण

चन्द्रमामा ल्यान्डरको ब्याट्री रिचार्ज गर्न सकिने सम्भावना बढेको जाक्साको भनाइ

जापानी चन्द्रयानमा रहेको सौर्य प्रणालीमा आएको समस्या समाधानको सम्भावना बढेको ‘जापान एरोस्पेस एक्सप्लोरेसन एजेन्सी (जाक्सा)’ ले सोमबार जनाएको छ । 

जाक्साले भनेको छ, ‘टेलिमेट्री डाटाअनुसार स्लिमका सौर्य कोषहरू पश्चिम दिशामा छन् र सूर्यको प्रकाश यान रहेको ठाउँमा परेपछि सौर्य प्रणालीले काम गर्ने अपेक्षा गरिएको छ ।’
 
जापानी चन्द्रयानमा रहेको सौर्य प्रणालीमा समस्या आएका कारण जापानले ‘मुन स्निपर’ चन्द्रमामा अवतरण गरेको करिब तीन घन्टापछि मुन ल्यान्डरलाई बन्द गरेको थियो । 

जापानको अन्तरिक्ष यानको मिसनलाई ‘मुन स्निपर’ नाम दिइएको छ । यसको सटिक अवतरण क्षमताले जापानलाई चन्द्रमामा सफलतापूर्ण रूपमा पुग्ने पाँचौँ देश बनाएको हो । मध्यरातमा अवतरणपछिको २० मिनेटको अन्तरालमा जाक्साले यानको सोलार ब्याट्रीले विद्युत् उत्पादन नगरेको बताइएको थियो । 

‘हामीले चन्द्रमाको सतहमा अवतरणका क्रममा प्राप्त प्राविधिक र तस्बिरको संकलन प्रसारण शक्ति बन्द हुनुभन्दा पहिले पूरा गर्न सफल भइसकेका छौँ,’ जाक्साले भनेको छ, ‘धेरै तथ्यांक प्राप्त भएको पुष्टि भएपछि हामी राहत महसुस गरिरहेका छौँ र उत्साहित हुन थालेका छौँ,’ जाक्साले भनेको छ । 

जाक्साले यस मिसनको नतिजा र स्लिम क्राफ्टको स्थितिबारे यसै हप्ता थप घोषणा गर्ने तयारी गरिरहेको बताएको छ । ‘अवतरणपछिको मुद्रा योजनाअनुसार भएन, तर हामी धेरै परिणामहरू प्राप्त गर्न सक्षम हुन सक्छौँ र हामी खुसी छौँ कि अवतरण सफल भयो,’ उसले भनेको छ ।

चन्द्रमामा पहिलोपटक अवतरण गरेको ५० वर्षपछि सरकार र निजी कम्पनीहरूले प्रक्षेपण गरेका थुप्रै नयाँ चन्द्र अभियानहरूमध्ये स्लिम पनि एक हो । दुर्घटनाग्रस्त अवतरण र सञ्चार विफलताहरू व्याप्त छन् । यसअघि अमेरिका, तत्कालीन सोभियत संघ, चीन र भारत चन्द्रमामा पुगेका छन् ।