बिवाइडी अटो इन्डस्ट्री कम्पनी लिमिटेडको नेपालका लागि आधिकारिक वितरक साइमेक्स इन्क प्रालिले देशका मुख्य–मुख्य स्थानमा ११ डिसी फास्ट चार्जर जडान गरेको छ । कम्पनीले पोखरा, नेपालगन्ज, बुटवल, विराटनगर, जनकपुर, नारायणघाट, अनामनगर, मूलकोट, बिर्तामोड, नक्साल र गुह्येश्वरीमा फास्ट चार्जर जडान गरेको हो ।
यी चार्जरहरूमध्ये १० वटा चार्जरले ३० किलोवाटको पावर आउटपुट दिने तथा मूलकोटमा जडित चार्जर भने ६० किलोवाटको रहेको जनाइएको छ । पहिले नै विभिन्न स्थानमा जडान गरिसकिएका ४० किलोवाटका १४ फास्ट चार्जर नेटवर्कलाई थप विस्तार गरिएको कम्पनीको भनाइ छ । चर्जिङ पूर्वाधारको सर्वसुलभ र व्यापक स्थापना गरी सवारीसाधनमा दिगो समाधान खोज्ने कम्पनीको प्रतिबद्धताअनुरूप भएको जनाइएको छ ।
साथै, सन् २०२३ को अन्त्यसम्ममा थप १८ डिसी फास्ट चार्जरहरू पनि सञ्चालनमा ल्याइने कम्पनीको भनाइ छ । बिवाइडी एट्टो थ्रीका लागि ८८ किलोवाटसम्मको डिसी फास्ट चार्जिङको प्रयोग गर्न सकिने तथा बिवाइडी डल्फिनमा ६० किलोवाटसम्मको चार्ज दिन सकिने कम्पनीले जनाएको छ । यसले ३० देखि ४५ मिनेटमा ८० प्रतिशतसम्म चार्ज गर्न सकिने उल्लेख छ ।