समाचार प्रिन्ट संस्करण

फैसलापछि उपप्राध्यापक प्रेमबहादुर चलाउनेले भने–न्याय मरेको रहेनछ

काठमाडौं जिल्ला अदालतले त्रिभुवन विश्वविद्यालयका उपप्राध्यापक प्रेमबहादुर चलाउनेमाथि मरणासन्न हुने गरी कुटपिट गर्ने नेविसंघका ६ जना कार्यकर्तालाई दोषी ठहर गर्दै दुई–दुई वर्ष कैदको फैसला गरेको छ । उनीहरूबाट चलाउनेलाई २८ लाख क्षतिपूर्ति भराउन पनि भनेको छ । मुद्दा फिर्ता गर्ने सरकारको निर्णय सर्वोच्च अदालतबाट उल्टिएपछि जिल्ला अदालतले सात प्रतिवादीमध्ये ६ लाई दोषी ठहर गर्दै सजाय तोकेको हो । 

फैसलापछि उपप्राध्यापक प्रेमबहादुर चलाउनेले भने–न्याय मरेको रहेनछ
यो फैसलाबाट मैले आंशिक न्याय पाएको अनुभूति गरेको छु । मलाई ज्यान मार्ने योजनासहित नै आक्रमण भएको थियो । ढिलै भए पनि सत्य र न्यायको जित भएको छ, न्याय मरेको रहेनछ ।

अदालतको पवित्रता कायम राख्नुको सट्टा प्रतिवादीहरूबाट शक्ति केन्द्र धाउने, सुनुवाइ नै हुन नदिने गरी अदालती प्रक्रियालाई बन्धक बनाउने र सिंगै सरकारलाई प्रभावित बनाएर मुद्दा फिर्ताको निर्णय गराई अपराधी उम्काउने जुन कार्य भइरहेको थियो, त्यो असफल भएको छ ।

मेरातर्फबाट पैरवी गर्ने सरकारी वकिल, अधिवक्ता, नागरिक समाज र सबैलाई म धन्यवाद दिन चाहन्छु । यो उहाँहरूको पनि जित हो । म अहिले पनि उक्त आक्रमणका कारण शारीरिक रूपमा पूर्ण स्वस्थ छैन । तर, आज न्यायाधीशको एक निर्भीक फैसलाका कारण अदालतको गरिमा जोगिएको छ ।

अब म्याद थाम्ने–थमाउने म्यादसमेत गुजारेर फरार रहेका, विदेशमा रहेकाहरू जो भए पनि नेपालमा ल्याएर अदालतको फैसला कार्यान्वयन हुनुपर्छ भन्ने मेरो माग हो । कसरी फैसला कार्यान्वयन हुन्छ हेर्न बाँकी छ ।