जिल्ला प्रशासन कार्यालय काठमाडौंले पद्मोदय मोडदेखि नयाँबानेश्वर चोकसम्म निषेधित क्षेत्र घोषणा गरेकाे छ।

जिल्ला सुरक्षा समितिकाे सिफारिसका आधारमा पद्मोदय मोडदेखि, माइतीघर, बबरमहल र नयाँबानेश्वर चोकसम्म निधेषित क्षेत्र घोषणा गरेको प्रशासनले जनाएकाे छ। यस क्षेत्रमा सोमबारदेखि ३० दिनसम्मका लागि कुनै पनि जुलुस निकाल्न र प्रदर्शन गर्न पाइनेछैन।

एक वा सोभन्दा बढी समूह एकै ठाउँमा भेला भई प्रदर्शन गर्दा मुठभेड भई  शान्ति सुरक्षा भंग हुनसक्ने भएकाले निषेधाज्ञा जारी गरिएको प्रशासनले जारी गरेकाे सूचनामा भनिएकाे छ।

‘देहायको क्षेत्रमा मंसिर ४ देखि ३० दिनसम्मका लागि पाँचजनाभन्दा बढी व्यक्ति भेला भई जुलुस, प्रदर्शन, धर्ना, घेराउ, अनशन, सभाजस्ता आन्दोलन वा विरोधका कार्यक्रम गर्न निषेध गरेको आदेश जारी गरिएको छ,’ सूचनामा उल्लेख छ।