चितवनको माडीमा नेपालकै ठूलो चक्रशिला (शालिग्राम)को मूर्ति स्थापना हुने भएको छ । १२ फिट अग्लो, १० फिट चौडाइ र साढे दुई फिट मोटाइ भएको करिब १५ टनको चक्रशिला पर्वतबाट माडी ल्याउन लागिएको हो ।
उक्त चक्रशिला माडीको खैरहनीमा रहने प्रस्तावित चक्रतीर्थ धाममा राखिने छ । नेपाल ललितकला प्रतिष्ठान मूर्तिकला विभाग प्रमुख एवं माडीका स्थानीय मूर्तिकार दिनेश्वर महतो नेतृत्वमा कुश्मा नगरपालिका–१, सहश्रधारास्थित कालीगण्डकी नदीको किनारमा नै कुँदेर शालिग्राम शिला ल्याउन लागिएको हो ।
सोमबार कुश्मा नगरपालिका मेयर रामचन्द्र जोशीले माडी नगरपालिकाकी मेयर ताराकुमारी काजी महतोलाई हस्तान्तरण गर्नेछन् । उक्त शिला मंसिर ७ गते हरिबोधनी एकादशी पर्वका दिन प्राणप्रतिष्ठासहित माडीमा अनावरण गरिने चक्रतीर्थ धाम विकास समितिका अध्यक्ष भागीरथ बस्यालले बताए ।
शालिग्राम शिला पाइने नेपालकै दुईमध्येका एक स्थानका रूपमा परिचित माडीको धार्मिक विकास तथा पर्यटनमा थप टेवा पुग्ने श्रीराम संस्थाका अध्यक्ष ई. थलराज पन्तले बताए ।