- वि.सं २o८१ बैशाख २१ शुक्रबार
मानव आवतजावतसहित १५ भदौबाट तातोपानी नाका खुलेसँगै चिनियाँहरू सीमामा सक्रिय हुन थालेका छन् । चीन सरकारले भोटेकोशी गाउँपालिकामा रहेको नमुना स्कुल झिर्पु माध्यमिक विद्यालयलाई खेलकुद र स्टेसनरी सामान सहयोग गरेको छ ।
न्यालम काउन्टीको समन्वयमा सिगात्से सहरको विदेश विभागले सामग्री सहयोग गरेको हो । विभागका प्रमुख मिस्टर छेतेन शुक्रबार मितेरी पुलमा आएर विद्यालयका अध्यक्ष आङछिरी शेर्पा, वडा नंं ३ का वडाध्यक्ष तथा पालिका शिक्षा समिति सदस्य निमासोना शेर्पासहितको विद्यालयको सल्लाहकार टिमलाई लिपिङमा सामान हस्तान्तरण गरेका हुन् ।
नेपाल–चीन कार्यकारी परिषद् सिन्धुपाल्चोकका अध्यक्षसमेत रहेका झिर्पु विद्यालयका सल्लाहकार लोब्साङ शेर्पाले चीन सरकारसँग समन्वय गरेका हुन् । सिगात्से सहरका विदेश विभाग प्रमुखले हस्तान्तरण गरेको सामग्रीमा चाइनिज लर्निङ बुक दुई सय थान, ब्याडमिन्टन र ब्याडमिन्टन ¥याकेट सय थान, २० बास्केटबल, स्किपिङ रोप एक सय थान, दुई सय थान डेस्क–बेन्च र केही शैक्षिक सामग्री छन् । नाका सुचारु भएपछि दैनिक रूपमा पाँच सय नेपाली र कम्तीमा ५० चिनियाँ नेपाल–चीन ३० किलोमिटर क्षेत्रमा आउजाउ गरिरहेका छन् ।
