- वि.सं २o८o श्रावण १० बुधबार
रुसका रक्षामन्त्री सर्गेई शोइगु नेतृत्वको प्रतिनिधिमण्डलाई प्योङयाङमा भव्य स्वागत गरिएको छ। कोरियाली युद्धविरामको वार्षिकोत्सव मनाउने सिलसिलामा रुसी टोली उत्तर कोरियाको भ्रमणमा गएको हो।
रुसी प्रतिनिधिमण्डल प्योङयाङ विमानस्थलमा अवतरण गर्दा रुसी राष्ट्रिय गीत बारम्बार बजाएर स्वागत गरिएको थियो भने विमानस्थल वरपरका सडकमा रुसी झन्डा फहराइएका थिए।
रक्षामन्त्री काङ सुन नामले आफ्ना रुसी समकक्षी शोइगुलाई विमानस्थलमा स्वागत गरेका थिए। उत्तर कोरियाली झन्डा र रुसी झन्डा सडकका दुवै किनारमा राखिएका उत्तर कोरियाली सरकारी सञ्चारमाध्यमले जनाएका छन्।
युद्धविरामको वार्षिकोत्सवका अवसरमा बिहीबार प्योङयाङमा विशाल सैन्य परेड हुँदै छ। चिनियाँ कूटनीतिज्ञ एवं सैनिकको टोली पनि रुसी अधिकारीहरूका साथ परेडमा उपस्थित हुने उत्तर कोरियाली समाचार समितिले जनाएको छ।
प्योङयाङले युद्धविराममा हस्ताक्षर गरेको ७० वर्ष पूरा भएको अवसरलाई विजय दिवसका रूपमा मनाउन सैन्य परेडलगायत कार्यक्रम आयोजना गर्न लागेको हो।
कोरोना महामारीलगायत कारणबाट लामो समयसम्म हुन नसकेका उच्चस्तरीय भ्रमण एवं आदानप्रदान अब सुरु भएका छन्। विश्वबाट एक्लिएको उत्तरका सिमाना सन् २०२० मा कोभिड महामारीका कारण बन्द भएको थियो।
