अर्थ डिजिटल संस्करण

६ महिनामा तरकारी र बागवानीको उत्पादन चार प्रतिशत बढ्यो

गत साउनदेखि पुससम्मको अवधिमा देशभित्र तरकारी तथा बागवानीको उत्पादन साढे चार प्रतिशतले बढेको छ।

हालै सार्वजनिक भएको आर्थिक गतिविधि अध्ययन प्रतिवेदनले यस्तो देखाएको हो। नेपाल राष्ट्र बैंकले चालू आर्थिक वर्ष ०७९/८० को साउनदेखि पुससम्मको तथ्यांकमा आधारित अर्धवार्षिक आर्थिक गतिविधि अध्ययन गरेर प्रतिवेदन सार्वजनिक गरेको हो।

चालू आर्थिक वर्षको पुस मसान्तसम्ममा प्रमुख कृषि बाली (खाद्य तथा अन्य बाली र तरकारी एवं फलफूल तथा मसला) को उत्पादन चार दशमलव तीन प्रतिशतले बढेको उल्लेख छ। यस्ता बालीले ढाकेको भूक्षेत्र भने दुई दशमलव एक प्रतिशतले घटेको छ।

खाद्य तथा अन्य बालीको उत्पादन मात्र पाँच दशमलव सात प्रतिशतले बढेको छ। प्रतिवेदनमा फलफूल र मसलाको उत्पादनमा भने क्रमशः पाँच दशमलव दुई प्रतिशत र आठ दशमलव चार प्रतिशतले घटेको छ। 

प्रतिवेदनअनुसार पशुजन्य उत्पादनअन्तर्गत दूध उत्पादन एक दशमलव चार प्रतिशत र मासु उत्पादन एक दशमलव सात प्रतिशतले वृद्धि भएको छ। त्यस्तै, अर्धवार्षिक अवधिमा अन्डा उत्पादन २६ दशमलव तीन प्रतिशतले घटेको छ। 

वनजन्य उत्पादनअन्तर्गत काठ उत्पादन १६ दशमलव २३ प्रतिशतले र औषधिजन्य वस्तुको उत्पादन सात दशमलव चार प्रतिशतले बढेको प्रतिवेदनमा उल्लेख छ।

चालू आर्थिक वर्षको पुस मसान्तसम्ममा उद्योगको क्षमता उपयोग औसतमा ४३ दशमलव सात प्रतिशत रहेको छ। यो अवधि बैंक तथा वित्तीय संस्थाले प्रवाह गरेको कुल कर्जामा औद्योगिक क्षेत्रमा प्रवाह भएको कर्जाको अंश २७ दशमलव नौ प्रतिशत रहेको छ।