एमाले अध्यक्ष केपी ओलीले नेपालले ३५ सय ३६ वर्षअघिबाट योग दिवस मनाउन सुरु गरेको बताएका छन् । नवौँ अन्तर्राष्ट्रिय योग दिवसका अवसरमा बुधबार एमाले केन्द्रीय कार्यालयमा आयोजित प्रवचन कार्यक्रममा उनले विश्वमै पहिलोपटक त्यति लामो समयदेखि नेपालले योग दिवस मनाउन सुरु गरेको बताएका हुन् ।
त्यसरी नेपालले लामो समयदेखि योग दिवस मनाउनुको पछाडि ऋषिमुनिहरूको जिनेटिक मेमोरीले काम गरेको ओलीले दाबी गरे । ‘अरूले मनाएका थिएनन्, तर नेपालले नै विश्वमा पहिलोपटक योग दिवस मनाउन किन प्रारम्भ गर्यो ? हामीसँग विद्वान् ऋषिमुनिहरूको जिनेटिक मेमोरी छ, स्मृति छ हामीसँग,’ उनले भने, ‘त्यो स्मृतिले हामीलाई झकझक्याइरहन्छ । त्यसैकारण हो ।’
ओलीले योगलाई जीवन संस्कारका रूपमा विकास गर्नुपर्नेमा पनि जोड दिए । समाजमा अराजकता, अनुशासनहीनता बढेको र जिम्मेवारीबोधको कमी भएको बताउँदै उनले जीवनलाई सार्थक बनाउन योग गर्नुपर्ने बताए ।
‘मैले भन्दै आएको छु, दिमागमा अहंकार पसेपछि ढोका लगाउँछ, चुकुल लगाउँछ, साँचो पनि लगाउँछ । केही ज्ञान, गुण, आचारण, सीप केही पनि प्रवेश गर्न पाउँदैन घमन्डले । अरू चिज प्रवेश नै गर्न पाउँदैन,’ ओलीले भने, ‘घमन्ड मात्रै हुन्छ दिमागमा । घमन्डी दिमागले केही सोच्नै सक्दैन । नाम नै अहंकार । मान्छे बन्नै सक्दैन । त्यसले मान्छेलाई दुष्टात्मा बनाउँछ ।’