- वि.सं Invalid date format
कांग्रेस रामेछापको पार्टी कार्यालयमा नेपाल विद्यार्थी संघको एक समूहले रिले अनशन सुरु गरेको छ।मंगलबारबाट विद्यार्थीका विभिन्न मागसहित पार्टी कार्यालयको मूल ढोकामा सातजना युवाले सातबुँदे माग राखेर रिले अनशन सुरु गरेका हुन्।
कांग्रेस जिल्ला कार्य समितिका पदाधिकारीहरूलाई जानकारी नै नदिई आफूहरूले रिले अनशन सुरु गरेको मनीष चौहानले बताए। अनशनमा राजेश भण्डारी, सरोज बुढाथोकीलगायतका विद्यार्थी नेता सहभागी छन्।
विभिन्न सातबुँदे मागसहित अनशनमा बसेकाहरूले नेविसंघको जिल्ला नेतृत्व र त्यसको वैधानिकता तथा अधिवेशनको माग गरेका छन्।
यस्तै, उनीहरूले विधानविपरीत पार्टी नेतृत्वको सिफारिस तथा नेतृत्व चयनको गलत प्रक्रिया र कांग्रेस जिल्ला कार्यसमिति रामेछाप मनोमानी ढंगले सञ्चालन गरिएको भन्दै त्यसविरुद्ध रिले अनशन थालिएको उनीहरूले बताए।
उनीहरूले आफ्नो माग पूरा नभएसम्म अनशन जारी राख्ने बताएका छन्। कार्यालयमा नेविसंघका विद्यार्थी धर्ना बसेको विषय आफूलाई कुनै जानकारी नै नभएको कांग्रेसका पार्टी उप–सभापति लेखबहादुर कार्कीले बताए।
