- वि.सं २o८o जेठ १८ बिहीबार
कपिलवस्तुको बाणगंगामा दुईजनाको हत्या भएको छ । बाणगंगा नगरपालिका– ६, मटेरियाका ७० वर्षीय बमबहादुर थारू र उनकी भतिजी २२ वर्षीय अन्जनी थारूको चक्कु प्रहार गरी हत्या गरिएको हो।
विवाहको प्रस्ताव अस्वीकार गर्दा उनीहरूको हत्या भएको कपिलवस्तुका प्रहरी नायब उपरीक्षक मीनबहादुर घलेले जानकारी दिए ।
दुवैजनामाथि आज बिहान ९ बजेतिर चक्कु प्रहार भएको थियो । तत्काल उपचारका लागि भतिजीलाई भैरहवा मेडिकल कलेज र काकालाई स्थानीय अस्पतालमा लगिएको थियो । बमबहादुरको जितपुरमा उपचारको क्रममा र अन्जनीको मेडिकल कलेज भैरहवामा मृत्यु भएको प्रहरीले जनाएको छ ।
रुपन्देहीको कञ्चनका २२ वर्षीय मोहन थारूले उनीहरूमाथि चक्कु प्रहार गरेको डिएसपी घलेले जानकारी दिए । प्रहरीका अनुसार मोहन थारू र अन्जनी थारू विगत दुई वर्षदेखि प्रेम सम्बन्धमा थिए । हत्या गर्ने थारूलाई प्रहरीले नियन्त्रणमा लिएर अनुसन्धान थालेको छ ।
