- वि.सं २o८२ श्रावण ६ मंगलबार
गत वैशाख १ देखि यही साउन ५ गतेसम्म देशभरका विभिन्न क्षेत्रमा भएका विपतजन्य दुई हजार ३२६ घटनामा १०२ जनाले ज्यान गुमाएका छन् ।
राष्ट्रिय विपत् जोखिम न्यूनीकरण तथा व्यवस्थापन प्राधिकरणका अनुसार ती विपतमा परेर अझै २० जना हराइरहेका छन् । कुल ५१२ जना घाइते भएका छन् भने चार हजार ३२३ परिवार प्रभावित भएका प्राधिकरणका प्रवक्ता एवं उपसचिव सुरेश सुनारले जानकारी दिए ।
उनका अनुसार मनसुनी विपतसहितका विभिन्न प्रकारका विपतजन्य घटनाबाट यसरी जनधनको क्षति भएको हो । बाढीका मात्रै एक सय ५१ घटनामा १३ जनाको मृत्यु र २० जना बेपत्ता भएका छन् । यो धेरैजसो रसुवा बाढीले क्षति पुर्याएको उनले बताए ।
त्यसैगरी, पहिरोका २०७ घटनामा नौ र भारी वर्षाका १०३ घटनामा दुईजनाको मृत्यु भएको छ । चट्याङका २२९ घटनामा २८, सर्पदंशका ६३ घटनामा पाँच, आगलागीका ९७६ घटनामा १४ जनाको मृत्यु भएको छ ।
यस्तै, हुरीबतासका २७३ घटनामा आठ, जनावर आक्रमणका १२१ घटनामा १२, लेक लागेका ३६ घटनामा ११ जनाको मृत्यु भएको पनि उनले बताए । अन्यमा र डढेलोका १५८ वटा घटना, भूकम्पका चार, डुंगा पल्टिएका दुई, असिनापानीका दुई घटना भएको, तर मानवीय क्षति नभएको पनि प्राधिकरणले जानकारी दिएको छ ।
ती घटनाबाट सबैभन्दा बढी बाढीले एक हजार २५४ घर प्रभावित बनाएको छ । यस्तै पहिरोले २४१, भारी वर्षाले ५४७, चट्याङले २६४, सर्पदंशले ७० र आगलागीले एक हजार ८९ परिवारलाई प्रभावित बनाएको पनि प्राधिकरणले जानकारी दिएको छ ।
डढेलोबाट २७, हुरीबतासबाट ५३१, जनावरको आक्रमणबाट १८६, लेक लागेर ३२, डुंगा पल्टिएर पाँच, असिनापानी र हुरीबाट ७७ परिवार प्रभावित भएको प्राधिकरणको विवरणमा उल्लेख छ ।
