स्थानीय तहको संख्या घटाउन माग

सांसद रुक्मिणी कोइरालाले राज्यको खर्च कटौती गर्दै मितव्ययी बन्नका लागि हाल कायम रहेको स्थानीय तहको संख्या घटाउन माग  गरेकी छिन् । राष्ट्रिय सभाको आजको बैठकमा उनले मौजुदा ७५३ बाट घटाएर ५५३ वटा स्थानीय तह कायम गर्न सुझाव दिइन् । 

बैठकमा कोइरालाले संविधानमा व्यवस्था भएका मौलिक हकको कार्यान्वयन गर्नुपर्नेमा पनि जोड दिइन् । उनले समतामूलक समाज निर्माणका लागि मौलिक हकको प्रत्याभूति गर्नुपर्ने बताइन् ।

‘संविधानको १६ देखि ४७ धारासम्म मौलिक हकको व्यवस्था गरिएको छ । तर, ती मौलिक हकको कार्यान्वयनको अवस्था कस्तो रहेको छ ? भन्ने विषयमा छलफल गर्न आवश्यक रहेको छ,’ कोइरालाले  भनिन्, ‘ती मौलिक हकको कार्यान्वयनका लागि बनेका विभिन्न ऐनहरू छन् । तर, ती ऐनहरूको प्रभावकारी रूपमा कार्यान्वयन गर्नुपर्छ । मौलिक हक कार्यान्वयनका लागि बनेका यी ऐन र नियमवालीको विषयमा अध्ययन गर्न आवश्यक छ ।’