उपचार खर्च तिर्न नसक्दा बन्धक बनाएर राखेका बिरामीलाई चितवन मेडिकल कलेज शिक्षण अस्पताल (सिएमसी)ले आइसियूबाट साधारण बेडमा सारेको छ । नयाँ पत्रिकामा समाचार प्रकाशित भएपछि कलेजले शुक्रबार साधारण बेडमा सारेको हो ।
मकवानपुरको भीमफेदी गाउँपालिका– ९ का ३४ वर्षीय राजु थिङ उपचारपछि निको भइसकेका छन् । तर, उनले उपचारमा लागेको चार लाख रुपैयाँ तिर्न नसक्दा अस्पतालले बन्धक बनाएर राखेको छ । उनलाई निको हुँदा पनि आइसियूमै राखेको थियो । शुक्रबार उनलाई आइसियूबाट साधारण बेडमा सारिएको उनकी पत्नी संगीताले बताइन् । ‘आइसियू महँगो थियो, साधारण बेडमा आएपछि केही राहत भएको छ,’ संगीताले नयाँ पत्रिकासँग भनिन् ।
साधारण बेडमा सारेपछि अस्पतालले पैसा तिरेर बिरामी घर लैजान भनेको उनले बताइन् । ‘सबै पैसा सकियो । ऋणदान गर्न पनि बिरामीलाई एक्लै छोड्न मिलेन । अब कसरी पैसा खोज्ने होला,’ संगीताले भनिन् ।
राजुका बुबा लालबहादुर ऋण खोज्न गाउँ गएका छन् । यसअघि चारवटा खसी बेचेर पैसा ल्याएका थिए । अहिले ऋण पनि नपाएको संगीताले बताइन् । जग्गा धितो राखेर ऋण लिन खोजे पनि नपाइएको उनले बताइन् । ऐलानी जग्गा भएकाले धितो राख्न पनि नसकिएको उनको भनाइ छ ।
समाचार प्रकाशित भएपछि जिल्ला प्रशासन कार्यालय, चितवनले पनि चासो दिएको छ । यस विषयमा सम्बन्धित स्थानीय तहसँग समन्वय गर्न प्रशासन कार्यालयले अस्पताललाई निर्देशन दिएको छ । ‘विपन्न परिवार हो कि होइन, बुझी त्यस ढंगबाट बिरामीलाई सहज रूपमा उपचारको व्यवस्था गर्न निर्देशन दिएका छौँ,’ प्रमुख जिल्ला अधिकारी नारायणप्रसाद भट्टराईले भने ।
अस्पतालका अध्यक्ष तथा प्रबन्ध–निर्देशक डा. हरिश्चन्द्र न्यौपानेले एक रुपैयाँ पनि छुट नदिने बताएका छन् । उनले सरकारको नियमभित्रै बसेर उपचारबापत शुल्क लिएको जनाउँदै निःशुल्क उपचार गर्न नसक्ने बताएका छन् ।
यो पनि पढ्नुहोस् >>>
निको भइसकेका बिरामी आइसियूमा बन्धक, बिल बढेको बढ्यै
उपचार खर्च तिर्न नसक्दा चितवन मेडिकल कलेजकाे आइसियूमै बिरामी बन्धक
