काठमाडौं । काठमाडौंको बाफलबाट चोरी भएको माइक्रोबस प्रहरीले फेला पारेको छ। घटनामा संलग्न रहेको आरोपमा प्रहरीले दुईजनालाई पक्राउ गरेको छ।
नागार्जुन नगरपालिका– ४ बाफलस्थित मनमती करिडोर सामुदायिक भवननजिक पार्किङ गरी राखिएको बा.१ज ९८०५ नम्बरको माइक्रोबस हराएपछि प्रहरीले खोजी सुरु गरेको थियो।
प्रहरी वृत्त स्वयम्भूबाट खटिएको टोलीले मंसिर २ गते कलंकीबाट उक्त माइक्रोबस फेला पारेको हो। त्यसपछि चोरीमा संलग्न रहेको आशंकामा प्रहरीले शनिबार बिहान १०ः३० बजे स्वयम्भूस्थित बुद्ध पार्कबाट दुईजनालाई नियन्त्रणमा लिएको जनाएको छ।
पक्राउ पर्नेमा धादिङको गल्छी गाउँपालिका– ६ घर भई हाल काठमाडौंको कलंकी बस्दै आएका ३७ वर्षीय बाबुराम तामाङ र सिन्धुलीको लखनपुर घर भई हाल स्वयम्भू बस्ने १८ वर्षीय विशाल लामा रहेका छन्।
प्रहरीले उनीहरूविरुद्ध चोरीसम्बन्धी कसुरमा जिल्ला अदालत काठमाडौंबाट पाँच दिनको म्याद थप गराई थप अनुसन्धान अघि बढाएको छ।