नेपाल नागरिक उड्डयन प्राधिकरण (क्यान)ले देशमा उत्पन्न भीषण बाढी तथा प्राकृतिक विपत्तिको विषम परिस्थितिलाई ध्यानमा राख्दै सबै हवाई सेवाप्रदायक कम्पनीहरूलाई हवाई भाडा नबढाउन निर्देशन दिएको छ । प्राधिकरणको हवाई यातायात विभागले बुधबार पत्र जारी गर्दै सर्वसाधारणको हितलाई मध्यनजर गरेर भाडादर नियन्त्रणमा राख्न निर्देशन दिएको हो ।
नेपाल वायुसेवा निगम, बुद्ध एयर, यती एयरलाइन्स, श्री एयरलाइन्स, समिट एयर, तारा एयर र सीता एयरलाई सम्बोधन गर्दै पठाइएको पत्रमा सरकारबाट स्वीकृत उच्चतम (म्याक्सिमम) भाडादरभन्दा कम र हालको परिस्थितिलाई मध्यनजर गर्दै समुचित एवं नबढ्ने गरी हवाई टिकट उपलब्ध गराउन भनिएको छ ।
प्राधिकरणका अनुसार प्राकृतिक विपत्का वेला यात्रुहरूसँग अस्वाभाविक वा अधिकतम भाडा असुल नगर्न र सहज रूपमा टिकट व्यवस्थापन गर्न सबै वायुसेवा कम्पनीलाई सख्त ताकेता गरिएको छ ।
