कांग्रेस केन्द्रीय नीति अनुसन्धान तथा प्रशिक्षण प्रतिष्ठानको आयोजनामा सुर्खेतमा सम्पन्न दुईदिने कर्णाली प्रदेश भेलाले २१ बुँदे संकल्प प्रस्ताव पारित गरेको छ । २८ र २९ वैशाखमा भएको भेलामा जनप्रतिनिधि र पार्टी नेतृत्वबिचको छलफलपछि कर्णालीको विकास र सुशासनका लागि साझा प्रतिबद्धता जनाइएको हो ।
कांग्रेस उपसभापति एवं प्रतिष्ठानका प्रमुख विश्वप्रकाश शर्माका अनुसार कर्णालीको जल, जंगल, जमिन, जडीबुटी र यहाँको विशिष्ट संस्कृतिलाई समुन्नतिको आधार बनाउने प्रण गरिएको छ । ‘खुसी कर्णाली’ नै समुन्नत नेपालको पहिचान बन्नुपर्छ भन्ने मान्यतालाई संकल्पको मूल मर्म मानिएको छ ।
सुशासन र सेवा प्रवाहमा जोड
पारित संकल्पमा नागरिकलाई घरदैलोमै सेवा पुर्याउने विषयलाई प्राथमिकता दिइएको छ । अपांगता भएका व्यक्ति, ज्येष्ठ नागरिक, गर्भवती र विपन्न बस्तीका नागरिकलाई घरआँगनमै सेवा दिने कार्यलाई थप व्यवस्थित बनाइने उल्लेख छ । हचुवाका भरमा योजना छनोट गर्ने परिपाटी अन्त्य गरी ‘प्रोजेक्ट बैंक’मार्फत परिणाममुखी र ठुला योजनालाई मात्र प्राथमिकता दिइने संकल्पमा उल्लेख छ ।
जनताको करबाट उठेको राजस्व अनुत्पादक क्षेत्रमा लगानी नगर्ने र विनियोजित बजेट सीमाबाहिर गएर अपारदर्शी निर्णय नगर्ने प्रतिबद्धता जनाइएको छ ।
त्यस्तै, कर्णालीको बेरोजगारी समस्या हल गर्न भेलाले केही नवीन कार्यक्रम घोषणा गरेको छ । ‘उद्यमी आमा’ कार्यक्रमअन्तर्गत महिलाको परम्परागत सिपलाई उद्यममा बदल्न र उत्पादनशील क्षेत्रमा उनीहरूको सहभागिता बढाउन यो कार्यक्रम सञ्चालन गरिने भएको छ । ‘श्रमदेखि उद्यमसम्म’ योजनाबाट वैदेशिक रोजगारीबाट फर्केका युवाहरूको सिप र अनुभवलाई कर्णालीमै उपयोग गरी उद्यम सुरु गर्न प्रोत्साहन गरिने उल्लेख छ । त्यस्तै, स्थानीय कच्चा पदार्थमा आधारित उद्योग र उद्यमशीलताका लागि कर सहुलियत तथा बजार प्रवर्द्धनको व्यवस्था गरिनेछ ।
शिक्षा र स्वास्थ्यमा लगानी
भेलाले शिक्षा र स्वास्थ्यलाई केवल संघीय अनुदानको भरमा नछोडी आन्तरिक स्रोतबाट समेत लगानी बढाउने संकल्प गरेको छ । कर्णालीको आफ्नै विशिष्टता झल्कने पाठ्यक्रम निर्माण, अनुसन्धानमा आधारित शिक्षा र गुणस्तरीय स्वास्थ्य सेवा सुधारका लागि सिर्जनात्मक कार्यक्रम ल्याइने संकल्प प्रस्तावमा उल्लेख छ । कर्णाली प्रदेशका स्थानीय तहका जनप्रतिनिधि, जिल्ला र प्रदेश तहका नेतृत्वको सहभागिता रहेको यो भेलाले कांग्रेसको आगामी कार्यदिशा र स्थानीय सरकार सञ्चालनको मोडेल तय गरेको बताइएको छ ।
