उच्च अदालत पाटनले अखिल नेपाल फुटबल संघ (एन्फा) लाई यही २८ माघमा झापामा गर्ने भनिएको चुनावी साधारणसभाका सबै प्रक्रिया रोक्न अल्पकालीन अन्तरिम आदेश जारी गरेको छ ।
सोमबार उच्च अदालतका न्यायाधीश कृपासुर कार्कीको एकल एजलासले आगामी ६ माघमा छलफलका लागि दुवै पक्षलाई उपस्थित हुन आदेश दिएको छ । सो मितिसम्म निर्वाचनका सबै प्रक्रिया स्थगनमा राख्न आदेश दिएको छ ।
यता, पंकजविक्रम नेम्वाङ नेतृत्वको एन्फाले भने राष्ट्रिय खेलकुद परिषद् (राखेप)को निर्देशनलाई लत्याउँदै निर्वाचन प्रक्रिया अगाडि बढाएको थियो । राखेपले एन्फा विधानका ११ बुँदा संशाेधन गरेर मात्रै निर्वाचन गर्न आदेश दिएको थियो ।
एन्फाले जिल्ला र प्रदेशको निर्वाचनविनै ‘अर्ली इलेक्सन’ गर्न खोजेपछि गोरखा जिल्ला फुटबल संघका सदस्य अमित खत्री अदालत पुगेका थिए ।
आगामी ४ असारमा नेम्वाङ नेतृत्वको एन्फाको कार्यकाल पूरा हुँदै छ ।
