गत २३ र २४ असोजमा जेन–जी आन्दोलनका क्रममा बागमती प्रदेशका उपत्यकाबाहेकका पाँच जिल्लाका कारागारबाट भागेका कैदीबन्दीमध्ये अझै ४३९ जना फरार छन् । बागमती प्रदेश प्रहरी कार्यालयको तथ्यांकअनुसार मकवानपुर, धादिङ, चितवन, रसुवा र सिन्धुलीका कारागारबाट एक हजार ८१८ जना कैदीबन्दी फरार भएका थिए ।
तीमध्ये हालसम्म एक हजार ३७९ जनालाई नियन्त्रणमा लिएर पुन: कारागार पठाइएको बागमती प्रदेश प्रहरी कार्यालयका प्रवक्ता एवं वरिष्ठ प्रहरी उपरीक्षक जितेन्द्रकुमार बस्नेतले जानकारी दिए । उनका अनुसार नियन्त्रणमा आएकामध्ये केही आफैँ फर्किएका हुन् भने धेरैलाई प्रहरीले विभिन्न स्थानबाट पक्राउ गरी पुन: कारागार पठाएको हो ।
प्रदेश प्रहरी कार्यलय हेटौँडाको तथ्यांकअनुसार मकवानपुरको क्षेत्रीय कारागार भीमफेदीबाट ४४० जना कैदी फरार भएका थिए । तीमध्ये २६८ जनालाई नियन्त्रणमा लिइए पनि १७२ जना अझै फरार छन् । उनीहरूको खोजीकार्य भइरहेको बस्नेतले बताए । यस्तै, हेटौँडा उपमहानगरपालिका– ११ थानाभर्याङस्थित बाल सुधारगृहबाट फरार भएका ७२ मध्ये ६२ जनालाई नियन्त्रणमा लिइए पनि १० जना अझै बेपत्ता छन् । फरार रहेका बालकको खोजीका लागि प्रहरीले परिवार र सम्बन्धित निकायसँग पनि समन्वय गरिरहेको उनको भनाइ छ ।
चितवन कारागारबाट आन्दोलनकै क्रममा फरार भएका ७३८ जना कैदीमध्ये हालसम्म ६०३ जनालाई नियन्त्रणमा लिइएको छ । १३५ जना अझै फरार छन् । फरारमध्ये केहीले भारत सीमावर्ती क्षेत्र हुँदै बाहिरिने प्रयास गरेकाले प्रहरीले विशेष खोजी टोली खटाएको प्रवक्ता बस्नेतले जानकारी दिए ।
आन्दोलनको फाइदा उठाउँदै रसुवा कारागारबाट ९७ जना फरार भएकामध्ये ९४ जनालाई पुन: नियन्त्रणमा लिइएको छ भने बाँकी तीनजनाको खोजी भइरहेको छ । सिन्धुली कारागारबाट ४७१ जना फरार भएकामध्ये ३५२ जनालाई पुन: कारागारमा ल्याइएको छ । ११९ जना अझै फरार रहेको प्रवक्ता बस्नेतले बताए ।
प्रहरीका अनुसार फरार रहेका कैदीबन्दीमध्ये अधिकांश जघन्य अपराधमा संलग्न छन् । वन्यजन्तुका सिकारी, बलात्कार, लागुऔषध कारोबार, अपहरण र कर्तव्य ज्यानजस्ता गम्भीर अपराधका अभियुक्त फरार भएपछि विभिन्न जिल्लामा त्रास फैलिएको प्रहरीले जनाएको छ । फरार कैदीबन्दीले सामाजिक सुरक्षामा असर पुर्याउने जोखिम बढेको भन्दै प्रदेश प्रहरीले उच्च सतर्कता अपनाएको प्रहरी प्रवक्ता बस्नेतले बताए ।
उनका अनुसार सम्पूर्ण फरार कैदीहरूको विवरण जिल्ला–जिल्लामा पठाइसकिएको र भारतीय सीमाक्षेत्रमा समेत निगरानी कडा पारिएको छ । उनले फरार कैदीबन्दीबारे जानकारी पाए तुरुन्त नजिकको प्रहरी कार्यलयमा खबर गरिदिन नागरिकहरूलाई पनि सूचित गरेको बताए । ‘हामीले प्रदेशका सबै जिल्लाका प्रहरी इकाइलाई खोजी र नियन्त्रणका लागि सक्रिय बनाएका छौँ,’ बस्नेतले भने, ‘नागरिकको सहयोगविना फरार कैदीबन्दीको खोजी कठिन हुन्छ, त्यसैले जोसुकैले फरार कैदीबारे जानकारी पाए पनि तुरुन्त प्रहरीलाई खबर गर्न अनुरोध गरेका छौँ ।’
