साेमबार १९ जना युवाहरूमाथिको नरसंहार हुने गरी भएको घटनाक्रमबारे भारतले चासो व्यक्त गरेको छ। भारतीय विदेश मन्त्रालयले मंगलबार जारी गरेको विज्ञप्तिमा संयम अपनाउन र शान्तिपूर्ण तरिकाले संवादमार्फत समाधान गर्नुपर्नेमा जोड दिएको छ ।
‘भारत नेपालको नजिकको मित्र र छिमेकीका रूपमा, सबै पक्षले संयम अपनाई समस्याहरूलाई शान्तिपूर्ण तरिकाले र संवादमार्फत समाधान गर्नुपर्ने विश्वास गर्दछ,’ विज्ञप्तिमा भनिएको छ। युवाहरूको दुःखद निधनप्रति गहिरो दुःख व्यक्त गर्दै भारतले शोकसन्तप्त परिवारप्रति समवेदना प्रकट गरेको छ र घाइतेहरूको शीघ्र स्वास्थ्यलाभको शुभकामना पनि व्यक्त गरेको छ ।
काठमाडौंसहित नेपालका विभिन्न सहरहरूमा जारी गरिएको निषेधाज्ञाबारे पनि जानकारी लिएको उल्लेख गर्दै भारतले नेपालमा रहेका भारतीय नागरिकलाई सतर्क रहन र नेपाली अधिकारीहरूले जारी गरेका नियम तथा निर्देशनहरूको पूर्ण पालना गर्न आग्रह गरेको छ।
