आर्मीले दिएको २६३ रन पछ्याएको कर्णालीले ३७.१ ओभरमा सबै विकेट गुमाएर १३५ रन जोड्यो
प्रधानमन्त्री कप एकदिवसीय क्रिकेट प्रतियोगितामा त्रिभुवन आर्मी क्लबले कर्णाली प्रदेशमाथि १२७ रनको सानदार जित निकालेको छ । सिद्धार्थनगरमा बिहीबार भएको खेलमा आर्मीले पहिलो ब्याटिङ गरी ५० ओभरमा नौ विकेट गुमाएर २६२ रन बनाएको थियो । प्रत्युत्तरमा कर्णालीले ३७.१ ओभरमा सबै विकेटको क्षतिमा १३५ रन मात्र जोडेको थियो । प्रधानमन्त्री कपमा आर्मीको यो लगातार तेस्रो जित हो ।
६ अंकका साथ आर्मी शीर्ष स्थानमा छ । दोस्रो स्थानमा रहेको एपिएफले दुई खेलबाट ४ अंक जोडेको छ । राष्ट्रिय खेलाडीले भरिएको नेपाल पुलिस क्लब तेस्रो स्थानमा छ । पुलिसले दुई खेलबाट ४ अंक जोडेको छ । कर्णालीले लगातार तीन खेल गुमाएको छ । कर्णालीविरुद्ध आर्मीका दुई खेलाडीले अर्धशतकीय इनिङ्स खेले । तृतराज दासले सर्वाधिक ६९ तथा कप्तान विनोद भण्डारीले ५६ रनको योगदान दिए ।
तृतराजले ८४ बलमा १० चौका र विनोदले ६४ बलमा दुई छक्का र चार चौका प्रहार गरे । यसैगरी भीम सार्कीले ७२ बलमा ४० तथा बसिर अहमेदले ३६ बलमा ३६ रन बनाए । कर्णालीको बलिङमा दिनेश अधिकारीले ७४ रनमा तीन विकेट तथा प्रकाश जैसीले ६४ रनमा चार विकेट हात पारे ।
आर्मीको कसिलो बलिङ
२६३ रन पछ्याएको कर्णालीले आर्मीको कसिलो बलिङको सामना गर्न सकेन । सो ब्याटिङ इनिङ्समा प्रकाश जैसीले सर्वाधिक ५० रनको योगदान दिएका थिए । उनले ७२ बलमा चार छक्का र दुई चौका प्रहार गरेका थिए । दसौँ क्रमका खेलाडी दिनेश अधिकारीले २५ बलमा समान दुई चौका र छक्का प्रहार गरी २२ रन बनाए । आर्मीको बलिङमा सोमपाल कामीले ६ ओभरमा ११ रन खर्चेर दुई विकेट लिए । आकाश चन्दले ४८ रनमा दुई विकेट हात पारे । सहाव आलामले १० ओभरमा दुई मेडन राखी २८ रन खर्चेर तीन विकेट लिए । यसैगरी कुशल मल्लले ४.१ ओभरमा १७ रन खर्चेर दुई विकेट लिए ।
लुम्बिनीको दोस्रो जित
लुम्बिनी प्रदेशले दोस्रो जित निकालेको छ । लुम्बिनीले गण्डकीमाथि १४ रनको जित निकालेको हो । पहिलो ब्याटिङ गरेको लुम्बिनी ४९.५ ओभरमा २१७ रनमा समेटियो । प्रत्युत्तरमा गण्डकीले ५० ओभरमा नौ विकेट गुमाएर २०३ रन जोडेको थियो । लुम्बिनीका निर्मल गुरुङले ३१ रन खर्चेर तीन विकेट लिए । गण्डकीको ब्याटिङमा ओपनर अर्जुन कुमालले ८७ बलमा ६२ रन तथा सुभाष भण्डारीले ३० रनको योगदान दिए । गण्डकीको ब्याटिङमा प्रज्वल थापाले सर्वाधिक ७२ रनको योगदान दिए । उनले ७९ बलमा सात चौका र एक छक्का प्रहार गरे । ओपनर मिर्नाल गुरुङले ६२ बलमा ३८ तथा मनीष थापाले ३४ बलमा २४ रन जोडे । कप्तान देव खनालले ४६ बलमा ३३ तथा विप्रसन केसीले २५ रनको योगदान दिए ।
