भदौ लागेसँगै लगातार ओरालो लागेको सेयर बजारमापक नेप्से परिसूचक आइतबार पनि घटेको छ। ३१ साउनयता परिसूचक ३०४.८८ अंकले घटेको छ । ३१ साउनमा परिसूचक ३०००.८१ विन्दु पुगेको थियो । त्यसपछि निरन्तरजसो ओरालो लाग्दै आइतबार ५३.६३ अंकले (१.९५ प्रतिशत) घटेर २६९५.९३ विन्दुमा आइपुगेको छ ।
आइतबार पिपुल्स हाइड्रोपावर कम्पनी र माईखोला हाइड्रोपावर कम्पनीको सेयर मूल्य १० प्रतिशतले घटेपछि सर्किट ब्रेकर लागेको छ । थ्री स्टार हाइड्रोपावरको सेयर मूल्य ९.९९ प्रतिशतले घटेको छ । उपकार लघुवित्त, नेपाल फाइनान्स र मिड सोलु हाइड्रोपावरको सेयर मूल्य ९ प्रतिशतभन्दा उच्च दरले घटेका छन् । बुद्धभूमि नेपाल, हिमालयन हाइड्रोपावर र माथिल्लो मैलुङ खोलाको सेयर मूल्य ७ प्रतिशतले घटेको छ।
फाइनान्स समूहको परिसूचक ३.४४ प्रतिशतले घटेको छ । होटेल तथा पर्यटन समूहको परिसूचक २.९८ प्रतिशतले घटेको छ । बैंकिङ समूहको परिसूचक २.३४ प्रतिशतले घटेको छ । जलविद्युत् समूहको परिसूचक २.४ प्रतिशत, माइक्रो फाइनान्सको १.८८ प्रतिशत, जीवन बिमाको १.४४ प्रतिशत र उत्पादनशील तथा प्रशोधन क्षेत्रमा १.८ प्रतिशतले घटेको छ । लगानी समूहको परिसूचक १.३३ प्रतिशत र निर्जीवन बिमाको सेयर मूल्य १.२३ प्रतिशतले घटेको छ।
१० अर्ब ५१ करोडमा खुम्चियो कारोबार
३१ साउनमा २९ अर्ब ३० करोडसम्मको कारोबार भइरहेकोमा आइतबार घटेर १० अर्ब ५१ करोडमा सीमित भएको छ । सबैभन्दा बढी कारोबार गुडविल फाइनान्सको ५२ करोड ३१ लाखको सेयर कारोबार भएको छ । हिमालयन रि–इन्स्योरेन्सको ३३ करोड ४३ लाखको कारोबार भएको छ । नेपाल फाइनान्सको ३३ करोड ३४ लाखको सेयर किनबेच भएको छ । अपि पावर कम्पनीको २६ करोड ७३ लाखको सेयर कारोबार भएको छ भने अरुणभ्याली हाइड्रोपावरको २१ करोड ९० लाखको सेयर कारोबार भएको छ । बजार पुँजीकरण भने ४२ खर्ब ८१ अर्ब कायम भएको छ ।
