जबर्जस्ती मिर्गौला बेच्न लगाउने गिरोहका दुई पक्राउ
आर्थिक प्रलोभनमा पारी जबर्जस्ती मिर्गौला बेचिदिने धन्दामा संलग्न दुईजना पक्राउ परेका छन् । पक्राउ पर्नेमा ललितपुर महालक्ष्मी नगरपालिका– ८ का ३७ वर्षीय शंकर खत्री र मकवानपुर भीमफेदी गाउँपालिका– २ की ४२ वर्षीया शान्तिमाया घलान छन् । मानव बेचबिखन अनुसन्धान ब्युरोले खत्रीलाई आइतबार र घलानलाई मंगलबार पक्राउ गरेको हो । उनीहरूले नुवाकोटका २८ वर्षीय युवालाई १० लाख रुपैयाँ दिने प्रलोभनमा जबर्जस्ती मिर्गौला बेच्न लगाएका थिए । यसका लागि युवालाई भारतको कोलकाता लगिएको थियो ।
पक्राउ परेका दुवैजना सोही धन्दामा संलग्नमध्ये रहेको ब्युरो प्रवक्ता एसपी गौतम मिश्रले बताए । ‘१० लाख रुपैयाँ दिने प्रलोभनमा एक युवालाई जबर्जस्ती मिर्गौला बेच्न लगाएछन् । गिरोहले भारतको कोलकाता पुर्याएर अनेक धाकधम्की दिई युवालाई मिर्गौला बेच्न लगाएछ, तर रकम भने दिएनछ । नेपाल फर्केर पीडितले दिएको जाहेरीका आधारमा उनीहरूलाई पक्राउ गरिएको हो,’ उनले भने ।
ब्युरोका अनुसार पीडित युवाको आर्थिक अवस्था कमजोर छ । दश लाख रुपैयाँ दिने प्रलोभनमा अभियुक्तले युवालाई मिर्गौला बेच्न सहमत गराएका थिए । त्यसपछि युवालाई काठमाडौंबाट सुमो चढाएर वीरगन्ज लगिएको थियो । वीरगन्जबाट रक्सौल हुँदै कोलकाता पुर्याइएको थियो ।
प्रहरीका अनुसार मिर्गौला बेच्न गिरोहका सदस्यले सबै कागाजत नक्कली बनाएका थिए । सोही आधारमा नाता प्रमाणित गरी युवालाई मिर्गौला बेच्न भनेका थिए । तर, कबुल गरेको रकम ‘ट्रान्सप्लान्ट’पछि दिने भनेपछि युवा अस्पतालबाट भागेका थिए । पछि गिरोहका सदस्यले उनलाई समातेर अनेक प्रलोभन दिएका थिए ।
नमानेपछि आफूलाई ज्यान मार्ने धम्की दिएकाले डराई डराई मिर्गौला दिएको उनले प्रहरीलाई बताएका छन् । मिर्गौला ‘ट्रान्सप्लान्ट’पछि युवालाई केही रकम दिएर गिरोहका सदस्यले नेपाल पठाएका थिए । नेपाल आएलगत्तै उनले प्रहरीमा जाहेरी दिएका थिए । गिरोहमा अन्य सदस्य पनि संलग्न रहेको हुँदा खोजीकार्य तीव्र पारिएको ब्युरो प्रवक्ता एसपी मिश्रले बताए ।
