नवलपुरमा खोलाले बगाएर दुईजना बेपत्ता भएका छन्। जिल्ला प्रहरी कार्यालय नवलपुरका प्रहरी नायब उपरीक्षक वेदबहादुर पौडेलका अनुसार नवलपुरको बौदीकाली गाउँपालिका– १ खारा घर भएका ४८ वर्षका विशाल कार्की खोलाले बगाएर बेपत्ता भएका छन्।
बिहीबार दिउँसो १२:४० बजेको समयमा गोरुसहित खेतमा काम गर्न जाने क्रममा बौदीकाली– १ को बौदी खोला तर्ने क्रममा सोही खोलाले बगाएर बेपत्ता भएका हुन् ।
त्यसैगरी, मध्यविन्दु नगरपालिका– ४ मदनपुर घर भएका ३५ वर्षका सूर्य परियारलाई पनि आजै खोलाले बगाएर बेपत्ता भएको नवलपुर प्रहरीले जनाएको छ । उनलाई मध्यविन्दु– १ पतवारीस्थित उल्टी खोला तर्ने क्रममा खोलाले बगाएको हो । बेपत्ता भएका दुवैजनाको खोजी जारी रहेको प्रहरीले जनाएको छ ।
