थोरै धितोमा धेरै ऋण प्रवाह गर्ने तत्कालीन सेन्चुरी कमर्सियल बैंकका अध्यक्ष राजेशकुमार श्रेष्ठसहित नौजना पक्राउ परेका छन् । पक्राउ पर्नेमा आठ सञ्चालक र एक कर्मचारी छन् । नेपाल प्रहरीको केन्द्रीय अनुसन्धान ब्युरो (सिआइबी)बाट खटिएको प्रहरी टोलीले श्रेष्ठसहित सुनीलकुमार न्यौपाने, प्रा.डा. गीता प्रधान, रमेशकुमार निरौला, रणबहादुर श्रेष्ठ, राजेशकुमार दली, उमाकुमारी श्रेष्ठ, अभिषेक बज्राचार्य र शिवगोपाल सिराललाई सोमबार काठमाडौंका विभिन्न ठाउँबाट पक्राउ गरेको हो ।
प्रहरीका अनुसार उनीहरूले अनेक जाली कागजात तयार गरी देउराली बहुउद्देश्यीय सहकारीका अध्यक्ष रवीन्द्र चौलागाईंको स्वामित्वमा रहेको पूजा ट्रेडिङ एन्ड मार्केटिङ, थ्री ब्रदर्स मार्केटिङ, पूजा मार्केटिङ र अन्नपूर्ण ड्रिस्टिलरीका नाममा कम धितोमा दुई अर्ब ३० करोड ८१ लाख रुपैयाँ कर्जा प्रवाह गरेका थिए । ‘देउराली सहकारीमा भएको आर्थिक हिनामिना अनुसन्धान भइरहेको थियो । यही क्रममा नक्कली कागजात खडा गरी सेन्चुरी बैंकबाट कम धितो राखेर झन्डै साढे दुई अर्ब रुपैयाँ ऋण प्रवाह भएको देखियो । घटनामा संलग्न अध्यक्षसहित नौजना पक्राउ परेका छन्,’ सिआइबी प्रवक्ता एसपी होवीन्द्र बोगटीले भने ।
उनीहरूले ऋण प्रवाहका निम्ति कारोबार धेरै देखाउन आन्तरिक राजस्व कार्यालयको नक्कली कर चुक्ता प्रमाणपत्र, मूल्य अभिवृद्धि करको नक्कली कागजात, लेखापरीक्षणको कागजात पनि नक्कली नै बनाएका थिए । उनीहरूले हुँदै नभएको कारोबारको स्टक तथा रिसिभेबल देखाई गलत वित्तीय विवरणसमेत तयार गरेको सिआइबीले दाबी गरेको छ ।
‘नेपाल राष्ट्र बैंकले जारी गरेको निर्देशन तथा निर्देशिकाको अधीनबाहिर गई प्रतिवादीहरूले आफूअनुकूलको अवस्था सिर्जना गरेको देखियो । सोही आधारमा कम्पनीहरूको वास्तविक कारोबार रकमभन्दा बढी कारोबार भएको भनी आन्तरिक राजस्व कार्यालयको नक्कली कर चुक्ता प्रमाणपत्रसमेत बनाएको देखियो । नक्कली लेखापरीक्षणसमेत बनाई गैरकानुनी रूपमा ऋण प्रवाह गरेको देखियो,’ बोगटीले भने ।
यसअघि सिआइबीले गत १४ फागुनमा सेन्चुरीका तत्कालीन वरिष्ठ नायब प्रमुख कार्यकारी अधिकृत (डिसिइओ) तथा प्रभु बैंकका डिसिइओ मनोज न्यौपानेसहित १० जना कर्मचारीलाई पक्राउ गरेको थियो । सेन्चुरीबाट देउराली सहकारीलाई एक अर्ब १४ करोड रुपैयाँ मूल्यबराबरको जग्गा धितो राखी दुई अर्ब ११ करोड ६५ लाख रुपैयाँ ऋण प्रवाह गरेको देखिएपछि सिआइबीले न्यौपानेसहितको टोलीलाई पक्राउ गरेको थियो ।
