१९ असोज बिहानदेखि परेको अविरल बर्सातपछि आएको बाढीले बाँकेका आठ हजार सात सय तीन परिवार प्रभावित भएका छन् । बाढीले बाँकेको सात हजार चार सय ६० हेक्टर जमिनमा लगाइएको बालीमा समेत क्षति पुगेको छ । बाढीले सबैभन्दा धेरै राप्तीसोनारी गाउँपालिकामा लगाइएको बालीमा क्षति पुर्याएको सहायक प्रमुख जिल्ला अधिकारी टोपेन्द्रबहादुर केसीले बताए । त्यहाँ एक हजार ६ सय ५० हेक्टर जमिनमा लगाइएको बालीमा क्षति पुगेको उनको भनाइ छ ।
त्यस्तै, डुडुवा गाउँपालिकामा एक हजार चार सय ६० हेक्टरमा रहेको बालीमा बाढीले क्षति पुर्याएको छ भने खजुरा गाउँपालिकामा एक हजार ९५, जानकी गाउँपालिकामा नौ सय ५०, बैजनाथमा आठ सय ३०, कोहलपुरमा सात सय ३० र नरैनापुरमा तीन सय ८० तथा नेपालगन्ज उपमहानगरपालिकामा तीन सय ६५ हेक्टरमा रहेको बालीमा क्षति पुगेको छ ।
राप्ती नदी, डुडुवा, मानखोला, रतैया नाला र पेडारी खोलामा आएको बाढीले बाँकेका आठ पालिकाका आठ हजार सात सय तीन घरपरिवार प्रभावित भएको जिल्ला विपत् व्यवस्थापन समितिले ठहर गरेको छ । बाढीले एक हजार एक सय ४३ परिवार विस्थापित भएको र एक सय ८१ घरमा पूर्ण क्षति तथा पाँच सय ९८ घरमा आंशिक क्षति भएको बाँकेका सहायक प्रमुख जिल्ला अधिकारी टोपेन्द्रबहादुर केसीले जानकारी दिए । बाढीमा परी दुईजना घाइते भएका छन् ।
राप्ती नदीमा आएको बाढीले सबैभन्दा धेरै क्षति राप्तीसोनारी गाउँपालिकामा पु¥याएको केसीले बताए । उनका अनुसार राप्ती नदीमा आएको बाढीबाट राप्तीसोनारी गाउँपालिकाका तीन हजार पाँच सय परिवार प्रभावित भएका छन् । उक्त पालिकाका सात सय ९८ परिवार विस्थापित भएको केसीले जानकारी दिए ।
वर्षाले नरैनापुर गाउँपालिकाका दुई हजार ६ सय ९६ परिवार प्रभावित भएका छन् । नरैनापुरका ५० परिवार विस्थापित भएका छन् । त्यहाँका ३५ घरमा पूर्ण क्षति र एक सय २० घरमा आंशिक क्षति पुगेको सहायक प्रमुख जिल्ला अधिकारी केसीले बताए । उक्त पालिकाका गंगापुर, मटेहिया, सोनवर्षालगायत गाउँमा राप्ती नदीले क्षति पु¥याएको छ ।
राप्ती नदी र डुडुवा खोलामा आएको बाढीले डुडुवा गाउँपालिकाका एक हजार नौ सय ५० परिवार प्रभावित भएका छन् । जिल्ला विपत् व्यवस्थापन समितिका अनुसार उक्त पालिकाका ९५ परिवार विस्थापित भएका छन् । बाढीले ४५ वटा घरमा पूर्ण र एक सय ३५ घरमा आंशिक क्षति पुर्याएको छ । त्यसैगरी, खजुरा गाउँपालिकाका दुई सय ४९ परिवार प्रभावित भएका छन् भने ३५ परिवार विस्थापित भएका छन् ।
बाढीले विस्थापित भएका दुई सय ५० परिवारलाई टेन्ट, एक हजार चार सय ५० थान त्रिपाल, चार हजार पाँच सयजनाका लागि खाद्यान्न, तीन सय ५० सेट कपडा र तीन सय ५० सेट भाँडाकुँडा आवश्यक रहेको जिल्ला विपत् व्यवस्थापन समितिले जनाएको छ । त्यस्तै, दुई हजार पाँच सय थान कम्बल, तीन हजार पाँच सय थान गुन्द्री, पाँच हजार पाँच सयजनाका लागि तयारी खाना, दुई हजार पाँच सय परिवारका लागि खानेपानी र दुई हजार पाँच सय थान झुल आवश्यक रहेको केसीले बताए ।