निर्वाचन सुरक्षामा प्रतिबद्ध हुन प्रधानसेनापति शर्माको निर्देशन

प्रधानसेनापति प्रभुराम शर्माले आसन्न प्रतिनिधिसभा र प्रदेश सभा निर्वाचनमा सुरक्षाका लागि प्रतिबद्ध हुन मातहतका सबै निकायलाई निर्देशन दिएका छन् । आइतबार सबै सकल दर्जालाई सम्बोधन गर्दै उनले समयमै काठमाडौं–तराई मधेस द्रुतमार्ग निर्माणका लागि पनि निर्देशन दिए । 

प्रधानसेनापति शर्माले ‘स्वतन्त्र, निष्पक्ष र विश्वसनीय वातावरणमा सम्पन्न गर्न मतपत्र छपाइ सुरक्षा, मतपत्र तथा मतपेटिका विकट र संवेदनशील क्षेत्रमा ढुवानीलगायत विस्फोटक पदार्थ निष्क्रिय गर्ने, मतदानस्थलको बाहिरी सुरक्षाजस्ता जिम्मेवारी उत्कृष्ट ढंगबाट निर्वाह गरी आफ्नो व्यावसायिकताको उदाहरण प्रस्तुत गर्न’ सकल दर्जालाई निर्देशन दिएको जंगी अड्डाले जनाएको छ ।

पदबहालीको एक वर्ष पूरा भएको अवसरमा उनले आइतबार सकल दर्जालाई सम्बोधन गरेका थिए । नेपाली सेनामा कार्यरत उपत्यकाभित्रका रथीवृन्द, अधिकृत, पदिक तथा अन्य दर्जा सहभागी रहेको कार्यक्रमलाई नेपाली सेनाका सम्पूर्ण फर्मेसन, युनिट तथा सबयुनिटमा लाइभ मल्टीकास्ट गरिएको थियो । शर्माले कार्यकालको पहिलो वर्षका लागि निर्धारण गरिएका लक्ष्य र प्राप्त उपलब्धिको समीक्षा गरेका थिए । 

‘विकसित अन्तर्राष्ट्रिय, क्षेत्रीय तथा राष्ट्रिय सुरक्षा वातावरणको सूक्ष्म अध्ययन र विश्लेषण गर्दै नेपाली सेनालाई प्राप्त संवैधानिक जिम्मेवारीलाई उत्कृष्ट रूपमा निर्वाह गर्नुका साथै राष्ट्रिय हितको संरक्षण तथा प्रवद्र्धन गर्न सदैव तयारी अवस्थामा रहन नेपाली सेनाका सकल दर्जालाई निर्देशन दिनुभएको थियो,’ सैनिक जनसम्पर्क तथा सूचना निर्देशनालयले विज्ञप्तिमा भनेको छ ।