फ्रन्ट पेज प्रिन्ट संस्करण

अस्ताए समाजवादी चिन्तक

समाजवादी चिन्तकका रूपमा परिचित प्रदीप गिरि चार दशकभन्दा लामो समयदेखि कांग्रेस राजनीतिमा सक्रिय थिए

कांग्रेस नेता एवं समाजवादी चिन्तक प्रदीप गिरिको शनिबार राति निधन भएको छ । ललितपुरस्थित मेडिसिटी अस्पतालमा उपचाररत ७५ वर्षीय गिरिको राति साढे ९ बजे निधन भएको हो । समाजवादी चिन्तकका रूपमा परिचित गिरि चार दशकभन्दा लामो समयदेखि राजनीतिमा संलग्न थिए ।

स्वास्थ्य अवस्था स्थिर बनेपछि गिरिलाई भेन्टिलेटरमा राखिएको थियो । मेडिसिटीमा डा. पंकज वर्मनसहितको चिकित्सक टोलीले उनको उपचार गरिरहेको थियो । गिरिको निमोनिया निको हुन नसकेको तथा घाँटीमा देखिएको क्यान्सर अन्य भागमा पनि फैलिँदै गएको थियो । 

भारतको मुम्बईमा घाँटीको क्यान्सरको उपचार गराएर स्वदेश फर्किएलगत्तै निमोनिया देखिएपछि गिरिलाई तीन साताअघि मेडिसिटी अस्पताल भर्ना गरिएको थियो । उनको निधनप्रति राजनीति नेतृत्वले दुःख व्यक्त गरेको छ । 

कांग्रेसले विज्ञप्ति निकालेर उनको निधनप्रति गहिरो दुःख व्यक्त गरेको छ । मित्रलाल र पुण्यप्रभाका छोरा गिरिका श्रीमती र एक छोरा छन् । उनी सिराहा १ बाट प्रतिनिधिसभा सदस्य हुन् । स्थायी ठेगना बस्तीपुर सिराहा रहेका गिरि हाल भीमसेनगोला काठमाडौंमा बस्दै आएका थिए ।

आइतबार ९–११ बजेसम्म पार्थिव शरीर अस्पतालमै श्रद्धाञ्जलीका लागि राखिने, ११ः३० देखि २ बजेसम्म पार्थिव शरीर श्रद्धाञ्जलीका लागि पार्टी केन्द्रीय कार्यालयमा राखिने र त्यसपछि अन्त्येष्टिका लागि पशुपति आर्यघाट लैजाने कार्यतालिका रहेको कांग्रेसले जनाएको छ । यसअघि प्रधानमन्त्री शेरबहादुर देउवालगायत नेताले अस्पताल पुगेरै गिरिको स्वास्थ्य अवस्थाबारे जानकारी लिँदै शीघ्र स्वास्थ्यलाभको कामना गरेका थिए । 

उनको अध्ययन, अनुसन्धान तथा लेखनमा रुचि थियो । उनले राजनीतिक आन्दोलनका क्रममा करिब चार वर्ष जेलजीवन बिताएका थिए । उनमा दर्शनमा आधारित भएर राजनीतिको विश्लेषण गर्ने क्षमता थियो । उनले भारतको जवाहरलाल नेहरू विश्वविद्यालयबाट दर्शनशास्त्र र अर्थशास्त्रमा स्नातकोत्तर गरेका थिए । हरेक राजनीतिक आन्दोलनमा उनको सक्रिय सहभागिता थियो । उनका लेनिन (जीवनी), नारी, माक्र्सवाद र अर्थशास्त्रलगायत एक दर्जनभन्दा बढी पुस्तक प्रकाशित छन् ।

०१७ को घटनाक्रमपछि राजनीतिमा सक्रिय उनी ०२४ मा बनारसमा नेपाल छात्र संघमा निर्वाचित भएका थिए । ०५१ को संसदीय निर्वाचनमा सिराहा ५ बाट निर्वाचित गिरि संविधानसभा सदस्य निर्वाचन, ०६४ मा कांग्रेसबाट समानुपातिक सभासद् भएका थिए । 

दोस्रो संविधानसभा सदस्य निर्वाचन, २०७० मा पनि कांग्रेसबाट समानुपातिक सभासद् चयन भएका थिए भने संघीय संसद् प्रतिनिधिसभा सदस्य निर्वाचन, २०७४ मा सिराहा १ बाट निर्वाचित बनेका थिए । उनी प्रतिनिधिसभा अन्तर्राष्ट्रिय सम्बन्ध समिति सदस्य थिए ।

शेरबहादुर देउवा, प्रधानमन्त्री
नेपाली कांग्रेसका नेता एवं नेपाली राजनीतिका वैचारिक र समाजवादी चिन्तक मेरा मित्र प्रदीप गिरिजीको निधनको खबरले निकै स्तब्ध भएको छु । उहाँको निधनले नेपालले एक सच्चा र असल नेता गुमाएको छ । उहाँको आत्माको चिरशान्तिको कामना गर्दै यस दुःखद खडीमा परिवारजनमा हार्दिक समवेदना व्यक्त गर्दछु ।

डा. शेखर कोइराला, कांग्रेस नेता
नेपाली राजनीतिका अग्ला व्यक्तित्व, समाजवादी चिन्तक तथा नेपाली कांग्रेसका नेता प्रदीप गिरिको निधनले स्तब्ध र मर्माहत बनाएको छ । नेपालको प्रजातान्त्रिक आन्दोलन तथा पार्टी संगठनमा प्रदीप दाइले पुर्‍याउनुभएको योगदानको जति नै चर्चा गरे पनि अधुरै रहन्छ । नेपालको सिंगो राजनीति र सिंगो कांग्रेस पार्टीमा प्रदीप दाइको अभाव सधैँ खट्किरहनेछ । शोकाकुल यस समयमा समस्त परिवारमा समवेदना तथा स्व. प्रदीप दाइप्रति भावपूर्ण श्रद्धाञ्जली !

शंकर पोखरेल, महासचिव, एमाले
नेपाली राजनीतिका एक अध्ययनशील चिन्तक तथा विचारक नेता प्रदीप गिरिज्यूप्रति भावपूर्ण श्रद्धाञ्जली !